«Սայտոտեկ» դեղորայքի ազատ վաճառքը, օգտագործումը բերում է բավական բարդությունների՝ արնահոսությունների, բորբոքային պրոցեսի, հետագա չբերության: Tert.am-ի հետ զրույցում խոսելով նշված դեղամիջոցի բացասական ազդեցության մասին՝ այս մասին ասաց Վերարտադրողական առողջության, պերինատալոգիայի, մանկաբարձության և գինեկոլոգիայի հանրապետական ինստիտուտի տնօրեն, գ.դ.պ. Ռազմիկ Աբրահամյանը:

Բժիշկը նշեց նաև, որ «Սայտոտեկ» դեղամիջոցը հիմնականում արտադրված է աղեստամոքսային տրակտի հիվանդությունների համար, սակայն փորձը ցույց է տվել, որ այն օգնում է արգանդի կծկողականությունը բարձրացնելու և վիժումներ առաջացնելու համար:

Հիշեցնենք, որ երեկ հրավիրված ասուլիսի ժամանակ ՄԱԿ-ի բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանը հայտարարել էր, թե 2010 թվականի տվյալով Հայաստանում տարեկան գրանցվում է մոտ 29 000 աբորտ։ Նա նաև նշել էր, որ կա «սայտոտեկ» դեղամիջոցը, որը նպաստում է վիժմանը, ինչից էլ Հայաստանի ազգաբնակչությունը բավական շատ է օգտվում:

«Քանի որ մեր հանրապետությունում գործող օրենքի համաձայն հղիությունների ընդհատումը թույլատրվում է միայն մանկաբարձագինեկոլոգիական ստացիոնարներում, ուստի դեղամիջոցը պետք է կիրառվի միայն մանկաբարձագինեկոլոգիական ստացիոնարներում։ Բնական է՝ այդ նպատակով ազատ վաճառքն արգելվում է»,– ասաց գինեկոլոգը։

Ռազմիկ Աբրահամյանը տեղեկացրեց, որ վերոնշյալ խնդիրներից խուսափելու համար առողջապահության նախարարությունը համապատասխան բաժիններին և վարչություններին հանձնարարել է այդ հարցը հրատապ ձևով կարգավորել:

«Մենք ունեցել ենք դեպքեր, երբ չչափավորված քանակով օգտագործել են «սայտոտեկ» դեղամիջոցը և «ընկել» են վերակենդանացման բաժանմունք: Չկա այդպիսի մի օր, որ այս կամ այն հիվանդանոցում նման դեպք չգրանցվի»,-եզրափակեց Ռազմիկ Աբրահամյանը: