Երեք տարում դեղերի արտահանումը 5 անգամ ավելացնելու ծրագիրը ամբիցիոզ է: Այդ մասին այսօր` դեկտեմբերի 23-ին լրագրողների հետ հանդիպման ժամանակ հայտարարեց «Լիկվոր» ընկերության տնօրեն Սերգեյ Մաթեւոսյանը:

Հիշեցնենք, որ վերջերս կառավարության հավանությանն արժանացած ծրագրում` «Արտահանման ուղղված արդյունաբերական քաղաքականության ռազմավարություն», դեղագործությունը այն 3 ճյուղերից մեկն է, որում պետք է պետություն-մասնավոր համագործակցության շրջանակներում արտահանման աճի ծրագրեր իրականացնել:

Ըստ Ս. Մաթեւոսյանի` Հայաստանը 2010 թ. արտահանել է 8 մլն դոլարի դեղագործական արտադրանք, արտահանման տարեկան աճը մոտ 20 % է: Արտահանման հիմնական շուկան ԱՊՀ երկրներն են, սակայն GMP ստանդարտների ներդրման շնորհիվ հնարավոր կլինի դեղեր արտահանել նաեւ եվրոպական շուկաներ:

Ս. Մաթեւեսյանի կարծիքով` պետությունը պետք է օժանդակի դեղարտահանողներին` «երկար փողեր» ունենալու հնարավորություն ստեղծելով, հետազոտական աշխատանքներին օժանդակելով, հայկական դեղերի շուկայական առաջխաղացմանը նպաստելով:

Հայաստանի դեղ արտադրողների եւ ներմուծողների (ԴԱՆ) միության տնօրեն Սամվել Զաքարյանը նշեց, որ դեղերի արտահանման ծրագիրը մշակվել է` հաշվի առնելով նաեւ միության կարծիքը: «Այդ բարձր նշաձողը` միքանի անգամյա աճ, մենք ենք առաջարկել, որը իրատեսական եմ համարում»,-ասաց Ս. Զաքարյանը: