Սամվել Ալեքսանյանի ընկերությունը խոչընդոտել է այլ ընկերության մուտքը շուկա.

Պատգամավոր Սամվել Ալեքսանյանի հետ փոխկապակցված «Նատալի ֆարմ» ընկերությունը տուգանվեց 50 մլն դրամով: ՀՀ տնտեսական մրցակցության պաշտպանության պետական հանձնաժողովն այսօր` հունիսի 11-ին հրապարակեց դեղերի պետական գնումների ոլորտում հարուցված վարչական վարությի արդյունքները:

Վարույթը հարուցվել է ԱԺ նախորդ գումարման պատգամավորներ Անահիտ Բաշխյանի ու Ստյոպա Սաֆարյանի («Ժառանգություն») դիմումի հիման վրա, ըստ որի` «Նատալի ֆարմը» շուկա մուտք գործելու խոչընդոտ է ստեղծում Վանաձորում գործող «Սզնի» ընկերությանը:

ՏՄՊՊՀ փորձագետ Մանուկ Միքայելյանը, ներկայացնելով ուսումնասիրության արդյունքները, ասաց, որ դեղերի պետական գնումների համակարգում իրոք տեղ են գտել մի շարք իրավախախտումներ, որոնք ազդեցություն են թողել մրցակցային դաշտի վրա: «Նատալի ֆարմի» վարքագիծը հակամրցակցային է դիտվել 8 մրցույթներում: Մասնավորապես` մրցույթից առաջ կամ հետո «Նատալի ֆարմը» կատարել է «ցեֆտրիաքսոն» դեղատեսակի նվիրատվություն, կամ այն մրցույթներում, որտեղ հայտ է ներկայացրել «Սզնի» ընկերությունը, կատարվել է ինքնարժեքից ցածր գնով առաջարկ: Այսինքն` դեղ է ներմուծել 207 դրամով, սակայն մրցույթին ներկայացրել է շատ ցածր գին` «Սզնի» ընկերությանը դուրս մղելու համար:

Փոխարենը` «Նատալի ֆարմը» եկամուտ է ստացել այլ մրցույթներից, որտեղ կարողացել է պայմանավորվել մասնակից այլ ընկերությունների հետ: Օրինակ` «Քամելիա» ընկերության հետ պայմանավորվածությամբ մասնակցել է թիվ 19 եւ այլ պոլիկլինիկաների հայտարարած մրցույթներին, սակայն «Քամելիան» միտումնավոր տեխնիկական սխալներով հայտեր է ներկայացրել ու դուրս մնացել մրցույթից: Արդյունքում` «Նատալի ֆարմը» դեղերն իրացրել է ավելի թանկ գնով: Մի շարք դեպքերում բուժհաստատությունները մրցույթներ չեն անցկացրել, որին նպաստել են նաեւ օրենսդրական բացերն ու սողանցքները:

ՀՀ ՏՄՊՊՀ նախագահ Արտակ Շաբոյանը հայտարարեց, որ «Նատալի ֆարմը» դեղերի ներկրման եւ իրացման ոլորտում ամենախոշոր ընկերությունն է` գրանցված է որպես գերիշխող դիրք գրավող: Ընկերությանը տուգանեցին 50 մլն դրամի չափով, այլեւս նման գործողություններ թույլ չտալու պայմանով: «Իրականում բուժհաստատություններն են ամենամեղավորը, չեն պահպանում գնումների ընթացակարգերն ու պետական գնումների օրենսդրությունը` բարենպաստ պայմաներ են ստեղծելով անբարեխիղճ մրցակցության համար»,- ասաց Ա. Շաբոյանը: Նրա խոսքով` ՏՄՊՊՀ-ն տեղեկություններ ունի, որ իրավիճակն արդեն զգալիորեն բարելավվել է` իրականացվում են պատշաճ մրցույթներ: