Եվրոպայի հիվանդությունների վերահսկման և կանխարգելման կենտրոնի (ECDC) նախաձեռնությամբ եվրոպական տարածաշրջանը այսօր նշում է հակաբիոտիկների նկատմամբ կայունության իրազեկման օրը: Այն հիանալի հնարավորություն է ևս մեկ անգամ հանրությանը հիշեցնելու հակաբիոտիկների խելամիտ օգտագործման կարևորության մասին:

Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, այս տարի հակաբիոտիկների նկատմամբ կայունության վերաբերյալ իրազեկման օրը ԱՀԿ եվորպական տարածաշրջանը նշում է «Չկա գործողություն այսօր, չկա բուժում վաղը» կարգախոսով:

Հակաբիոտիկների հայտնաբերման շնորհիվ փրկվել են միլիոնավոր կյանքեր, սակայն դրանց չարաշահումն այսօր զրկում է շատերին արդյունավետ բուժման հնարավորությունից: Հակաբիոտիկների նկատմամբ կայունությունն աճում է, արդյունավետ հակաբիոտիկների թիվը` կրճատվում: Դեղակայուն վարակների բուժումը ոչ միայն ծանր առողջապահական, այլև շատ լուրջ տնտեսական խնդիր է: Եվրոպական տարածաշրջանում արդեն իսկ արձանագրվում են մեծ դժվարությամբ բուժման ենթարկվող վարակների դեպքեր, որոնց բուժումը մոտ 100 անգամ ավելի թանկ է: