Դեղորայքային թունավորումների դեպքերը բացառելն անհնար է, եթե անգամ դաշտը վերահսկվում է: Հունիսի 21-ին լրագրողների հետ հանդիպմանը Հայաստանի Դեղարտադրողների եւ ներմուծողների միության տնօրեն Սամվել Զաքարյանը նշեց, որ իրենք մշտադիտարկումներ են անցկացնում կասկածելի դեղերը բացահայտելու համար:

«Դեղը քիմիական տարրերի միացություն է, ուստի ժամկետանց լինելով կարող է վնասել օրգանիզմին: Ներմուծողներն էլ, արտադրողներն էլ փորձում են դեղի ժամկետի ավարտին մի քանի ամիս մնալու դեպքում այն դուրս բերել վաճառքից, քանի որ դեղը կարող է թունավորման պատճառ դառնալ»,- նշեց Զաքարյանը: Թունավորման դեպքերի պատասխանատուներ միության տնօրենը համարում է հենց դեղարտադրողներին ու ներմուծողներին: Դեղորայքի շուկայում գների մեծ տարբերություններ չկան. որոշ դեղերի գնաճ կա, որոշների` գնանկում, ինչը բանախոսը պայմանավորեց դեղերի սեզոնայնության հետ: Ընդհանուր առմամբ` գնային հավասարակշռությունը պահպանվում է:

Ժամկետանց դեղերը, համաձայն օրենքի, պետք է ոչնչացվեն: Զաքարյանի փոխանցմամբ` դրանք փաթեթավորվում են, տրվում Էջմիածնում գործող հատուկ կազմակերպությանը: Դեղերը ոչնչացվում են մի քանի տարբերակով` այրելու, փաթեթավորելու եւ թաղելու միջոցով: Միության տնօրենը նկատեց, որ ներկայում շատ հեշտ է բացել դեղատուն, ստանալ լիցենզիա եւ աշխատել: Այստեղ արդեն դեղատունն է որոշում` ժամկետանց դեղեր վաճառվելու են, թե ոչ: Ամեն դեպքում, Զաքարյանի համոզմամբ, մարդիկ պետք է գիտակցեն` ինչպես կարելի է անգամ հազարավոր դրամներ վաստակելու համար մարդուն ժամկետանց դեղ վաճառել, որը կարող է հանգեցնել անդառնալի հետեւանքների: Ի տարբերություն ժամկետանց դեղերի` սխալ կամ անորակ բաղադրությամբ դեղերի վաճառքը Հայաստանում Զաքարյանը բացառեց: