Դեղերի նկարագրություն
Դեղորայքի որակի հսկողությունը արդիական է
«Առեւտրի եւ ծառայությունների մասին օրենքում» կատարված փոփոխությունների համաձայն, նոյեմբերի 1—ից պետք է կատարվի դեղերի պարտադիր դրոշմավորում։ Երեկ ԱԺ—կառավարություն հերթական հարցուպատասխանի ժամանակ ԱԺ ՀՅԴ խմբակցության քարտուղար Աղվան Վարդանյանն անդրադարձավ դրոշմավորման արդյունավետությանը։ Պատգամավորը մեջբերեց ոլորտի կարեւոր ընկերություններից մեկի տնօրենի հոդվածը, որում փորձում է ապացուցել, որ օրենքի այդ դրույթը չի կարող արդյունավետ լինել, որովհետեւ ոլորտում ստվերը բավական փոքր է ու չի կրճատվելու։ Առողջապահության նախարար Արմեն Մուրադյանը նշեց, որ հարցն արդեն մի քանի անգամ քննարկվել է նախարարությունում. «Կառավարությունում եւս քննարկումներ եղել են բարձրացված հարցի շուրջ եւ հանգեցրել են այն եզրակացության, որ շուկայում առկա անգամ փոքր քանակության կեղծ դեղերը կամ չգրանցված դեղերը կարիք ունեն պարտադիր հսկողության։ Եվ այդ առումով՝ յուրաքանչյուր դեղամիջոց, որը ստեղծվում է ՀՀ—ում կամ ներմուծվում է՝ վերահսկվում է»։
Նա ընդգծեց, որ կեղծ դեղորայքի ներմուծման կանխարգելումը յուրաքանչյուր պետության կարեւորագույն խնդիրներից մեկն է, եւ դեղորայքի որակի ստուգման յուրաքանչյուր մեխանիզմ մեզ համար արդիական է։
Նախարարը նաեւ նշեց, որ որակի վերահսկման մոտեցում չի կարող լինել սպառողի հաշվին։
Լիլիթ ԱՍԱՏՐՅԱՆ
