Ավստրալացի գիտնականները սկսել են կանանց համար «Վիագրա»-ի փորձարկումները

Ավստրալացի գիտնականները սկսել են կամավորների հավաքագրել, որպեսզի նրանք մասնակցեն կանանց համար նախատեսված «Վիագրա»-ի կլինիկական փորձարկումներին։

Այս դեղամիջոցը միտված է ուժեղացնելու կնոջ սեռական ցանկությունը և օգնել հասնելու հեշտանքի (օրգազմ)։ Նախատեսվում է, որ փորձարկումներին կմասնակցի 19-49 տարեկան մոտ 100 կին՝ Ավստրալիայից, Կանադայից և Միացյալ Նահանգներից։

Tefina անվանումով դեղամիջոցը ստեղծվել է Մելբուրնի «Մոնաշ» համալսարանի մասնագետների կողմից։ Իրականում այն իրենից քթի գել է ներկայացնում և պարունակում է տեստոստերոն հորմոնը, որը նպաստում է սեռական ցանկության գրգռմանը։ Ավելի վաղ ամերիկացի գիտնականներն ապացուցել են, որ այս հորմոնն ուղղակի կապ ունի հեշտանքի հասնելու հետ։

Tefina-ի ստեղծողների խոսքով՝ քթանցքերի հատվածում քսելուց մի քանի վայրկյան անց գելը ներծծվում է, սակայն դրա ազդեցությունը տևում է մի քանի ժամ։

«Կանանց սեռական ֆունկցիայի խանգարումը շատ լուրջ խնդիր է, քանի որ, ըստ մեր տվյալների, դրանից տառապում է կանանց 43%-ն ամբողջ աշխարհում։ Ընդհանուր առմամբ հեշտանքի բացակայությունը կապված է և՛ հոգեբանական, և՛ ֆիզիկական պատճառների հետ»,- նշել է հետազոտության ղեկավար Ֆիոնա Ջեյնը։