Դեղերի նկարագրություն


Բժշկությունն ու դեղագործությունը՝ մեկ հարթակի ներքո

Բժշկությունն ու դեղագործությունը՝ մեկ հարթակի ներքոՀՀ—ում առողջապահության եւ դեղագործության ոլորտում գործող ընկերությունների ծառայություններն ու արտադրանքը հանրությանը ներկայացնելու, նոր գործարար կապեր ստեղծելու նպատակով յուրաքանչյուր տարի անցկացվում է «Առողջապահություն եւ դեղագործություն EXPO» միջազգային ցուցահանդեսը։ Արդեն 15 տարի անընդմեջ մասնագիտացված այս ցուցահանդեսը դարձել է ավանդույթ՝ մեկտեղելու բժշկական կենտրոնների ղեկավարներին, գիտաշխատողներին, ներդրողներին, ձեռնարկատերերին, ինչպես նաեւ բժշկական ապրանքների եւ ծառայությունների շուկայում աշխատող մասնագետներին միեւնույն հարթակի ներքո։

Երեկ մեկնարկեց «Առողջապահություն եւ դեղագործություն EXPO–2016»—ը, որին մասնակցում էին ավելի քան 80 ընկերություններ, շուրջ 30 տոկոսը՝ արտերկրից։ Ավանդույթ դարձած այս միջոցառմանը մասնակցելու նպատակով Հայաստան են եկել առողջապահական ոլորտի ընկերությունների ներկայացուցիչներ Ռուսաստանից, Բելառուսից, Իրանից, Գերմանիայից, Լեհաստանից, Իսրայելից։ Այս կերպ ցուցահանդեսի մասնակիցները եւ այցելուները հնարավորություն են ստանում ծանոթանալու արտասահմանյան ընկերությունների պրոֆեսիոնալ ձեռքբերումներին, արդի բժշկության զարգացման միտումներին։

Ցուցահանդեսի կազմակերպիչն է LOGOS EXPO կենտրոնը։ Կազմակերպիչների գնահատմամբ, այս ցուցահանդեսը լավագույն միջոց է ներկայացնել Հայաստանի առողջապահության եւ դեղագործական ոլորտում ներգրավված ընկերություններին եւ խթանել միջազգային հարթակում հայկական արտադրանքի ճանաչումն ու իրացումը, նպաստել գործարար փոխշահավետ կապերի ստեղծմանն ու օտարերկրյա ներդրումների ընդլայնմանը։
ՀՀ առողջապահության փոխնախարար Գագիկ Միրիջանյանը նշեց, որ ԱՆ—ն կարեւորում է նման ձեւաչափով միջոցառումների կազմակերպումը, որն արդյունավետ է բժշկության եւ դեղագործության ոլորտները մեկտեղելու տեսանկյունից։

Ցուցահանդեսի շրջանակներում կանցկացվեն սեմինարներ, կլոր սեղաններ եւ շնորհանդեսներ, որոնք կնպաստեն նոր գործընկերների ձեռքբերմանը եւ բոլոր մասնակիցների միջեւ կապերի ամրապնդմանն ու ընդլայնմանը։ Կանցկացվեն նաեւ վարպետաց դասեր, բուժիչ կոսմետիկայի, հիգիենայի պահանմանը եւ խնամքին ուղղված դասընթացներ եւ այլն։

ՀՀ երիտասարդ բժիշկների ասոցիացիայի նախագահ, ուռոլոգ Գեւորգ Գրիգորյանի գնահատմամբ, նման միջոցառումները լավագույն հարթակ են, որպեսզի տարբեր կազմակերպություններ հնարավորություն ունենան ցույց տալու իրենց արտադրանքը, ծառայությունները, ինչը նպաստում է տարբեր նախագծերի ստեղծմանը եւ փոխգործակցության ամրապնդմանը։ Իսկ ցուցահանդեսի այցելուների համար ստեղծվում է հնարավորություն՝ ծանոթանալու մեր երկրի առողջապահական համակարգի նորարարություններին։ «Ներկայումս աշխարհում կա միտում հանրային առողջապահության զարգացման առումով, իսկ հանրային առողջությունն առանց հանրային կարծիքի լինել չի կարող։ Կարեւոր է, որպեսզի նման վայրերում մարդիկ ծանոթանան բժշկական արդի մոտեցումների, նոր ապրանքանիշների եւ նոր ծառայությունների հետ»,–նշեց Գեւորգ Գրիգորյանը։

Այս տարվա ցուցահանդեսը հատկանշական է այն առումով, որ տեղական եւ արտասահմանյան ընկերությունները տաղավարների միջոցով ներկայացրել են բժշկական սարքավորումների մեծ քանակություն եւ արտադրության լայն տեսականի։

Այս տարի հերթական անգամ ցուցահանդեսի շրջանակներում կազմակերպվելու է նաեւ մասնագիտացված ատամնաբուժական ցուցահանդես, որը կանցկացվի ցուցահանդեսային համալիրի առաջին հարկում։ Առողջապահական եւ դեղագործական ընկերությունները ներկայացնում են բազմապիսի ոլորտներ, մասնավորապես՝ կանխարգելման բժշկություն, կլինիկական բժշկություն, ստոմատոլոգիա, դեղագործություն, ախտորոշում եւ այլն։

Լուսինե ՆԱԶԱՐՅԱՆ





  0.019697 | 508kb