Դեղերի նկարագրություն


Հակաբիոտիկների սխալ օգտագործման հետեւանքով մանրէները մուտացիայի են ենթարկվում

Հակաբիոտիկների սխալ օգտագործման հետեւանքով մանրէները մուտացիայի են ենթարկվումՀակաբիոտիկների հայտնագործումը բժիշկներին հնարավորություն տվեց փրկել միլիոնավոր մարդկանց, որոնք առանց այդ դեղամիջոցների հավանաբար դատապարտված էին: Բայց այսօր` 21-րդ դարում, հակաբիոտիկների անվերահսկելի ընդունումը կարող է լուրջ խնդիրների հանգեցնել: Այդ մասին լրագրողների հետ հանդիպմանն ասել է Հայաստանի առողջապահության նախարար Արմեն Մուրադյանը:

Հակաբիոտիկների սխալ օգտագործման հետեւանքով մանրէները մուտացիայի են ենթարկվում եւ անզգա են դառնում դրանց հանդեպ, ինչի հետեւանքով շատ մասնագետներ ահազանգ են հնչեցնում. եթե ոչինչ չձեռնարկվի, հակաբիոտիկակայունությունը կարող է բժշկությունը եւ մարդկությանը վերադարձնել միջնադարի ժամանակաշրջան, երբ այսօրվա չափանիշներով նույնիսկ աննշան վարակները կարող էին հարյուրավոր եւ հազարավոր մարդկանց սպանել:

«Հակաբիոտիկների դեմ կայունության խնդիրն իրոք գլոբալ եւ շատ լուրջ խնդիր է», - նշել է նախարարը` հավելելով, որ այդ խնդիրը վերաբերում է ոչ միայն առողջապահությանը եւ բժշկությանը, այլեւ շատ այլ ոլորտների:

Օրինակ` խոշոր եղջերավոր անասուններին այսօր հակաբիոտիկներ են տալիս ավելի ինտենսիվ աճի եւ վարակիչ հիվանդությունների կանխարգելման համար: Սակայն երբ մարդիկ կենդանիների միս են օգտագործում, որոնց չափից շատ հակաբիոտիկներ են տվել, դա մեծացնում է նրանց մոտ հակաբիոտիկակայունության խնդիրների առաջացման վտանգը:

Իրենք` մարդիկ եւս հաճախ սխալ են օգտագործում հակաբիոտիկները, ինչը հանգեցնում է դրանց հանդեպ անզգայության զարգացման: Օրինակ` որոշ մարդիկ հիվանդանալով սկսում են հակաբիոտիկներ օգտագործել ծանոթների կամ դեղագործների խորհրդով (իրականում նրանք կարող են այնպիսի վարակիչ հիվանդություն ունենալ, որի դեմ հակաբիոտիկներն անօգուտ են, բայց իրենք դա չգիտեն): Ուրիշներն էլ մինչեւ վերջ չեն խմում բժշկի նշանակած հակաբիոտիկների կուրսը, երբ սկսում են իրենց ավելի լավ զգալ. չեն ուզում իրենց «թունավորել»: Այդ ամենը հանգեցնում է հակաբիոտիկակայունության զարգացման:

Ինչպես նշել է նախարարը, մարդուն հակաբիոտիկներ նշանակելուց առաջ անհրաժեշտ է պարզել, թե ճշգրիտ որ մանրէն է հիվանդության պատճառ դարձել եւ որ կոնկրետ հակաբիոտիկի հանդեպ է զգայուն, այդ դեպքում հակաբիոտիկի նշանակումն արդարացված կլինի: Բայց հենց այնպես հակաբիոտիկներ ընդունելը, չպարզելով մանրէների զգայունությունը դրանց նկատմամբ (եւ նույնիսկ վստահ չլինելով, որ հիվանդությունը մանրէական է), բավականին վտանգավոր է:

«Հակաբիոտիկները միանշանակորեն պիտի բաց թողնվեն դեղատնից` բժշկի նշանակմամբ: 21-րդ դարում առանց ցուցումների հակաբիոտիկների չարաշահումն ուղղակի բարբարոսություն է», - նշել է նախարարը:





  0.029059 | 515kb