ՀՀ առողջապահության նախարարությունը մի շարք օգտակար խորհուրդներ է հրապարակել ուսումնական տարվան ընդառաջ. «Դպրոցական երեխաների առողջական վիճակը պայմանավորված է մի շարք գործոններով։ Դպրոցը պետք է լինի այն միջավայրը, որը ոչ միայն կապահովի կրթական մակարդակը, այլեւ կծառայի որպես առողջ միջավայր՝ երեխայի աճի եւ զարգացման համար։

Երեխայի օրգանիզմի զարգացման համար կարեւորագույն դեր ունեն դպրոցական կահույքն ու պարագաները. հիմնականում՝ դպրոցական պայուսակը, կոշիկը, սենյակի լուսավորությունը, օդափոխությունը եւ այլն։

Կարեւոր է դպրոցականների՝ տանը եւ դպրոցում նստարանի առջեւ ոչ ճիշտ դիրքով նստեցումը, ինչի պատճառը հաճախ լինում է տարիքին եւ դպրոցականների հասակին նստարանների չափսերի անհամապատասխանությունը։ Աշակերտական նստարանը պետք է լինի հարմար՝ գործառնական չափերով այն պետք է համապատասխանի երեխայի տարիքին բնորոշ անթրոպոմետրիկ ցուցանիշներին։

Ուսումնական պարապմունքների ժամանակ պետք է ապահովել երեխայի մարմնի ճիշտ դիրքը նստած վիճակում՝ ինչը ապահովում է ծանրության հավասարաչափ բաշխումը ողնաշարի վրա։ Առողջության պահպանման եւ ճիշտ կեցվածքի ձեւավորման նպատակով անհրաժեշտ է հանրակրթական հաստատություններում ուսուցման առաջին իսկ օրվանից սովորողներին դաստիարակել, եւ ձեւավորել ճիշտ աշխատանքային դիրք աշակերտական նստարանի մոտ։ Բացի այդ սովորողներին պետք է ցույց տալ ոչ ճիշտ նստելու դեպքում կեցվածքի շեղումները ցուցադրող աղյուսակներ։


Գրելիս եւ կարդալիս աշակերտի ճիշտ դիրքի պահանջներն են՝

1) գլխի թեթեւակի հակում դեպի առաջ, էջից աչքերի 35—40սմ հեռավորություն,

2) սեղանին հենված նախաբազուկներ, սեղանից իրանի 3—5 սմ հեռավորություն,

3) ոտնաթաթերը հենված հատակին կամ նստարանի հորիզոնական պայտին,

4) ոտքերը ծալված ծնկային եւ կոնքազդրային հոդում ուղիղ անկյան տակ,
5) ազդրի 3/4—ը պետք է գտնվի նստատեղի վրա,

6) ողնաշարը գոտկային մասով պետք է հենվի նստարանի թիկնակին։
Այս դիրքը կոչվում է ուղիղ նստեցում, որը հիգիենիկ առումով աշակերտի համար ամենից ճիշտն է եւ ամենահարմարը։

Դպրոցական միջավայրի անբարենպաստ գործոնների ազդեցությունն աճող օրգանիզմի վրա կարող է հանգեցնել հենաշարժիչ համակարգի (կեցվածքի) ֆունկցիոնալ շեղումների՝ ողնաշարի սկոլիոզների, լորդոզների եւ կիֆոզների։ Սկոլիոզը հենաշարժողական ապարատի հիվանդություն է, որին բնորոշ է ողնաշարի ծռումը դեպի կողային հատված։ Այն կարող է լինել բնածին ու ձեռքբերովի։ Կարեւոր է մշտական շարժողական ակտիվությունը՝ ներառյալ մարմնամարզությունը՝ մարմնի ուղղաձիգ դիրքում պահող մկանների վարժեցումը նպաստում է ճիշտ կեցվածքի զարգացմանը։

Շատ կարեւոր է ճիշտ պայուսակի ընտրությունը. խորհուրդ է տրվում օգտագործել ուսապայուսակներ եւ ոչ փափուկ ուսապարկեր՝ հատկապես ցածր դասարաններում։ Տարրական դասարաններում սովորող երեխաների համար դպրոցական պայուսակի քաշը պետք է լինի ոչ ավելի, քան 600—700 գրամ։ Դպրոցական պայուսակի քաշը չպետք է գերազանցի աշակերտի քաշի 10%—ը։ Անհրաժեշտ է դպրոցական պայուսակը կրել այնպես, որպեսզի ծանրությունը հավասարաչափ բաշխվի մարմնի վրա։ Եթե պայուսակը ձեռքին են կրում, ապա չի կարելի այն անընդհատ նույն ձեռքով բռնել։
Երեխաների առողջության համար կարեւոր է ձեռքերի եւ մաշկի հիգիենան։ Հիգիենայի պահպանումը կարող է զերծ պահել մի շարք վարակիչ հիվանդություններից»։