Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, առողջապահության համաշխարհային կազմակերպության (ԱՀԿ) տեղեկատվության համաձայն 2017թ. հունվարի վերջին Բրազիլիայի մի քանի նահանգներում արձանագրվել են դեղին տենդի բռնկումներ: Արձանագրված ավելի քան 410 դեպքի (կասկածելի և հաստատված) մեծ մասը եղել է մահվան ելքով: 2000 թվականից ի վեր սա Բրազիլիայում դեղին տենդով հիվանդացության ամենաբարձր ցուցանիշն է:

Հաշվի առնելով այս հանգամանքը` ՀՀ առողջապահության նախարարության աշխատակազմի առողջապահական պետական տեսչությունը ՀՀ պետական սահմանի անցման կետերում ուժեղացրել է հսկողությունը էնդեմիկ և համաճարակային իրվիճակով անապահով երկրներից, մասնավորապես՝ Բրազիլիայից ժամանած անձանց (այդ թվում` տարանցիկ ուղևորների) առողջական վիճակի նկատմամբ։

Ելնելով ներկա իրավիճակից, ՀՀ առողջապահության նախարարությունը Բրազիլիա մեկնողներին առաջարկում է մեկնումից առնվազն 10 օր առաջ պատվաստվել դեղին տենդի դեմ, ինչպես նաև տեղում պաշտպանիչ միջոցներ օգտագործել մոծակների խայթոցից խուսափելու նպատակով: