Դեղերի նկարագրություն
Ֆրանսիական ճանաչված «ԱՆԻՈՍ» բրենդը Հայաստանում
«Ֆարմատեք» դեղագործական ընկերությունում բացվեց ֆրանսիական «Laboratoires ANIOS» ընկերության հոսքագիծը։ Կարմիր ժապավենը կտրելու իրավունքը վերապահված էր ՀՀ առողջապահության նախարար Լեւոն Ալթունյանին եւ կազմակերպության հիմնադիր—տնօրեն Բերտրան Լյուտարին։Կարեւորելով ճանաչված բրենդի մուտքը Հայաստան՝ Լեւոն Ալթունյանը նշեց, որ աշխարհում, հատկապես առողջապահության ոլորտում ախտահանիչների մեծ շուկա ունեցող «ԱՆԻՈՍ»–ը բացի Ֆրանսիայից, Իտալիայից, Շվեյցարիայից եւ Թուրքիայից, այսուհետեւ կարտադրվի նաեւ Հայաստանում՝ պատշաճ արտադրական գործունեության հավաստագիր ունեցող դեղագործական ընկերությունում։
«Դժվար է գերագնահատել մի բրենդի մուտքը Հայաստան, որի արտադրած ախտահանիչների կիրառումով բժշկական մեր հաստատություններում արձանագրվեց ներհիվանդանոցային վարակների նվազեցման միտում»,–ասաց նախարարը՝ փաստելով, որ արձանագրվում է արտասահմանյան հերթական ներդրումը։
Թե որքանով են որակյալ եւ նախընտրելի ֆրանսիական լաբորատորիաներում ստեղծված միջոցները՝ կարելի է կարծիք կազմել օծանելիքների միջոցով։
Ավելի քան 115 տարի իր կայուն տեղն ունեցող, իր արտադրանքով աշխարհի բազմաթիվ երկրներում պահանջված ընկերությունը, հասկանալի է, միայն Հայաստանի շուկայով չի բավարարվի։ Առաջիկա ծրագրերում ԵԱՏՄ եւ ավելի մեծ շուկաներ դուրս գալն է։
«Laboratoires ANIOS»—ի մուտքը Երեւան ողջունեց նաեւ Հայաստանի Հանրապետությունում արտակարգ եւ լիազոր դեսպան Ժան—Ֆրանսուա Շարպանտիեն։
«Մենք մտադիր ենք ավելի աշխույժ համագործակցություն զարգացնել հատկապես տնտեսական ոլորտում»,–նշեց դեսպանը։
«ԱՆԻՈՍ»—ը ապուպապս է հիմնադրել։ 115 տարի առաջին հերթին առողջապահական հիմնարկություններում կռիվ ենք տալիս բացիլների ու վարակների դեմ։ Սա այն աղետն է, որ տարածում է գտել ամբողջ աշխարհում։ Միլիոնավոր հիվանդներ բարդություններ են ունենում ներհիվանդանոցային տարբեր վարակներից։ Այդ իսկ պատճառով մենք մշակել ենք դրանց վնասազերծելու մեր մեթոդաբանությունն ու տեխնոլոգիաները»,–ասաց Բերտրան Լյուտարը՝ հավելելով որ Հայաստանում կունենան հերթական ուսումնաարտադրական կենտրոնը։
Նշենք, որ ֆրանսիական հումքով պատրաստված «Hexanios» եւ «Surfanios» ապրանքատեսակները «Գառնիլայն» ընկերությունը մրցունակ գներով առաջինը կներկայացնի Հայաստանում եւ Ղրղըզստանում։
