Սուրճի և կանաչ թեյի մշտական օգտագործումը կարող են ուղեղի կաթվածի վտանգը նվազեցնել 14-20%-ով, տեղեկացնում է «ՌԻԱ Նովոստի» գործակալությունը՝ Stroke ամսագրին հղումով։


Ճապոնիայի Ուղեղային ու սրտանոթային ազգային կենտրոնի հետազոտողները 45-74 տարեկան ավելի քան 83 հազար ճապոնացիների շրջանում հարցում են անցկացրել, թե որքան հաճախ են սուրճ և կանաչ թեյ օգտագործում։


Ուսումնասիրությունը տևել է 13 տարի։ Արդյունքում պարզվել է, որ ամեն օր առնվազն մեկ գավաթ սուրճը 20%-ով նվազեցնում է ուղեղի կաթվածի վտանգը։


Սուրճի ավանդական բաժակի ծավալը Ճապոնիայում 170 միլիլիտր է կազմում։


Այն մարդիկ, ովքեր ամեն օր 2-3 գավաթ կանաչ թեյ են խմել, 14%-ով նվազեցրել են կաթված ստանալու հավանականությունը, իսկ այդ ըմպելիքի սիրահարները, ովքեր առնվազն 4 բաժակ են խմում, վտանգը նվազեցրել են 20 %-ով։


Հետազոտության մասնակիցները, որոնք օրական առնվազն մեկ բաժակ սուրճ կամ երկու բաժակ կանաչ թեյ են օգտագործել, 32%-ով քիչ հավանական է, որ ուղեղային արյունազեղում ունենան։


Հետազոտողները նշում են, որ երկու խմիչքների դրական ազդեցությունը սրտանոթային համակարգի առողջության վրա բացատրվում է այն հանգամանքով, որ դրանք կանխում են արյան թանձրացումը։