Գարնանը հիմնականում սրվում են շնչառական ալերգիաները՝ պայմանավորված բնության մեջ կատարվող մի շարք գործոններով: Ինչպես այսօր լրագրողների հետ հանդիպման ժամանակ ասաց ալերգոլոգ Աստղիկ Բաղդասարյանը, գարնանային ալերգիաները հիմնականում ալերգիկ հարբուխներն են, ասթման և ատոպիկ դերմատիտը, դրանք հիմնականում սրվում են ծաղկափոշիների ծաղկման սեզոնին:

«Այն մարդիկ, ովքեր ունեն ստորին շնչուղիների բորբոքում, որն արտահայտվում է ասթմայի ձևով, կարող են ունենալ դժվարաշնչություն, հազ, սուլող շնչառություն: Սրանք հիմնական սեզոնային ալերգիաների ախտանիշներն են: Մարդկանց մի խումբ կա, որոնց մոտ կարող է լինել ատոպիկ դերմատիտ, այսինքն` մաշկի չորացում, ցան մաշկի վրա, որը հստակ սեզոնային բնույթ է կրում: Այս մարդիկ պետք է հատուկ պաշտպանիչ քսուկներ օգտագործեն և մաշկի խնամքին մեծ ուշադրություն դարձնեն»,- նշեց Ա.Բաղդասարյանը:

Նա նշեց, որ գարնանը հատկապես պետք է զգուշանան այն մարդիկ, ովքեր մեղուների և տարբեր միջատների թույնի նկատմամբ ալերգիա ունեն:

Ալերգոլոգի խոսքերով՝ վերջին տարիներին Հայաստանում շնչառական ալերգիաներն ավելի մեծ տարածում են գտնում, և ռենիտի ու ասթմայի հաճախականությունը սկսում է աճել:

Ըստ նրա՝ Հայաստանում ամենատարածվածը մարգագետնային խոտերի ծաղկափոշիներն են, որոնց նկատմամբ ալերգիան գերակշռող է: Դրա սեզոնն սկսվում է ապրիլի կեսերից և ավարտվում սեպտեմբերին: Այսինքն՝ Հայաստանում շնչառական ալերգիաների համար ռիսկային են համարվում ապրիլից մինչև սեպտեմբեր ընկած ժամանակահատվածները:

Առհասարակ բոլոր նրանց, ովքեր տառապում են գարնանային ալերգիայով, Աստղիկ Բաղդասարյանը խորհուրդ է տալիս ծաղկման սեզոնը սկսվելուց առաջ դիմել բժշկի, որոշել ալերգիայի առաջացման պատճառները և ստանալ կանխարգելիչ բուժումներ: