Առողջապահության նախարարությունը մարտի 28-ից մինչ օրս, երբ ստացել է հայաստանյան շուկայում կեղծ դեղերի շրջանառության մասին ահազանգը, ուսումնասիրություններ է իրականացրել երևանյան 25 դեղատներում:

ԱՆ մամուլի քարտուղար Շուշան Հունանյանն ասաց, որ հարուցվել են վարչական վարույթներ դեղատնային գործունեություն իրականացնող սուբյեկտների կողմից դեղերի ոլորտը կարգավորող օրենսդրության համապատասխանությունը պարզելու համար: Կազմվել է հանձնաժողով, որում ընդգրկված են դեղերի, վերահսկողական վարչությունների ու այլ շահագրգիռ կազմակերպությունների մասնագետներ:

Նաև հանգստյան օրերին իրականացրած ուսումնասիրությունների արդյունքում, ինչպես ասաց մամուլի խոսնակը, հայտնաբերվել են ժամկետանց ու չգրանցված դեղեր:

««Վարչական իրավախախտումների մասին» օրենսգրքի համաձայն, հայտնաբերված խախտումների հիման վրա հարուցվում են վարչական տույժեր` դրամական տուգանքի տեսքով: Այժմ պատրաստվում են անհրաժեշտ փաստաթղթերը, որպեսզի ուղարկվեն սուբյեկտներին»,-փոխանցեց նախարարության ներկայացուցիչը, չհրապարակելով սուբյեկտների, նաև դեղամիջոցների անունները. «Իրավունք չունեմ»: Նրա խոսքով, ժամկետանց ու չգրանցված դեղերը դեղատները հանել են վաճառքից:
Ուսումնասիրությունները կշարունակվեն, դրանք կմեկնարկեն նաև մարզերի դեղատներում: «Ազգաբնակչության համար մենք հայտարարություն կանենք պաշտոնապես»,-ասաց ԱՆ ներկայացուցիչը:

Ուսումնասիրությունները քանի դեռ ընթացքի մեջ են, Հունանյանը հրաժարվեց հավելյալ տեղեկություններ տրամադրել, թե ինչ է արվելու հայտնաբերված ժամկետանց ու չգրանցված դեղերի հետ: Առայժմ հայտնի չէ նաև, թե ովքեր են եղել այդ դեղերը ներկրողները:

Հիշեցնենք, որ Պետական եկամուտների կոմիտեից Panorama.am-ի հետ զրույցում հայտնել էին, որ չգրանցված դեղերի` մասնավորապես Բելառուսում արտադրված «Ստեկլովիդնոյե տելո» դեղի հայաստանյան շուկայում հայտնվելու վերաբերյալ մաքսային մարմիններին ավելի հստակ տեղեկությունների տրամադրման դեպքում, կոմիտեի կողմից քննության կառնվեն ներկայացված փաստերը և սահմանված կարգով կիրականացվեն համապատասխան միջոցառումներ մաքսային կանոնների խախտման դեպքերի հայտնաբերման նպատակով, իսկ դրանց առկայության դեպքում կիրականացվեն մաքսային մարմինների իրավասության մեջ գտնվող լրացուցիչ այլ միջոցառումներ նման դեպքերի կանխարգելման ուղղությամբ:

ՊԵԿ-ից նաև հիշեցրել էին, որ ՀՀ կառավարության 20 սեպտեմբերի 2000 թվականի N 581 որոշման պահանջներին համապատասխան` Հայաստանի Հանրապետություն դեղերը և (կամ) դեղանյութերը կարող են ներմուծվել Հայաստանի Հանրապետության առողջապահության նախարարության կողմից տրված ներմուծման հավաստագրի հիման վրա, որը տրվում է փաստաթղթային և (կամ) լաբորատոր փորձաքննությունների հիման վրա: