Ինչպես հայտնում է Daily Mail-ը, Վաշինգտոնի համալսարանի գիտնականները մշակել են նոր մեթոդ, որի շնորհիվ հնարավոր կլինի մինչ ծննդաբերությունը սաղմի մոտ ախտորոշել շուրջ 3500 գենետիկ խանգարումներ:

Ներկայումս մասնագետները սաղմի մոտ խանգարումների բացահայտման համար նմուշ են վերցնում հղի կնոջ ընկերքից` հատուկ զննաձող անցկացնելով արգանդի վզիկից, որը էական արդյունք չի տալիս, որովհետև նրանով հնարավոր է պարզել հիվանդությունների լոկ մի փոքր մասը: Գիտնականները հույս ունեն, որ վերոնշյալ նոր մեթոդը լայն տարածում է գտնելու, քանի որ նրա կրառումը մորն ու սաղմին ֆիզիկական ոչ մի անհանգստություն չի պատճառում:

Բանն այն է, որ այս մեթոդը շատ պարզ կիրառում ունի. սաղմի մոտ գենետիկ խանգարումներն ախտորոշվում է մոր արյան և հոր թքի նմուշների միջոցով, նախքան մեթոդի մշակումը, գիտնականները հետազոտել են սաղմի ԴՆԹ-ի շղթան, մոր արյան ու հոր թքի ԴՆԹ-ներն ու դրանք համադրելով` ստացել ապագա երեխայի ամբողջական գենետիկ կոդը…

Ծննդաբերությունից հետո նրանք համեմատել են սաղմի նախապես ստացված և արդեն ծնված երեխայի գենետիկ կոդերն ու հայտնաբերել, որ դրանք լիովին համընկնում են:

Թեև նորագույն մեթոդը բավականին հարմար է, գիտնականները մտավախություն ունեն, թե այն կարող է խթանել արհեստական վիժեցման թվի աճին. երեխայի մոտ առկա խանգարումների մասին նախապես իմանալով` ծնողները կարող են նրան հեռացնելու որոշում կայացնել:

Այդպես կլինի թե ոչ`գիտությունը նահանջել չի սիրում…Ուստի` իրերի նման դասավորվածության պարագայում պարզապես կպահանջվի համապատասխան քարոզչություն` հօգուտ նոր մեթոդի: