Էկոլոգներն ահազանգում են. պարֆյումը (նույն օծանելիքը) կործանարար է ազդում շրջապատի վրա, առաջացնում է հիվանդություններ, քայքայում է մարդկանց հոտառությունը: Նրանք ասում են, եթե հետաքրքիր զննենք մեր շուրջը, կպարզվի, որ օծանելիքը չարաշահող մարդիկ չեն զգում, կամ` լավ չեն զգում հոտերը: Դա վերաբերում է նաև սննդին:

Մենք արդեն մոռացել ենք, թե ինչ բույր ունի մարդկային մարմինը: Ծայրահեղության մեջ ընկնել, անշուշտ, պետք չէ, բայց շատ ուսյալ ու հայտնի մարդիկ կան, որ գերադասում են դեզոդորանտ փչելու փոխարեն ամեն օր լոգանք ընդունել, կամ 5-10 րոպե մարմինը ցայել ջրացնցուղի տակ:

Բոլորն, արդյոք, գիտեն, որ աղմուկ հանած կամ լավ վաճառվող օծանելիքներից/բրենդ/ շատերը մեզ գրավում-զարմացնում են, սակայն իրականում դրանց բաղադրության մեջ արտադրողներն օգտագործում են արգելված նյութեր`չքաշվելով ոչ-ոքից, նույնիսկ միջազգային օրենքից:

Հատկապես զգուշանալ է պետք էժան "դուխի-մուխիներից": Ակամայից տրվելով ընդհանուր աժիոտաժին` մենք մեզ ու մեր մերձավորների, մտերիմների համար գնում ենք…մեկեն գներն զգալիորեն էժանացվող օծանելիքներ` չմտածելով անգամ, թե ինչի կարող է հանգեցնել դա:

Եղել են դեպքեր, որոնք ոչ միայն պետք է զգուշացնեն, այլև վախեցնեն մեզ: Ամեն օր շռայլորեն օդեկոլոն օգտագործող պապը չի էլ կասկածել, որ ինքն է դարձել թոռան ասթմայի պատճառ…Օծանելիք ցայած կինը վերելակում նոպա է հրահրել թույլ սեռի մեկ ուրիշ ներկայացուցչի մոտ, պատճառ դարձել նրա շնչահեղձ լինելուն: Իրեն ու տաքսասրահիկին "բուրավետություն պարգևած" վարորդը ուղևորի մոտ ալերգիա է առաջացրել, ընդհուպ մինչև գիտակցության կորուստ: Ամուսինը կնոջ հոբելյանին նվիրած դուխիով, որը նա, հեղինակության թե ապահովության համար, պատվիրել էր "հայտնի օծանիլիքագործի", ահավոր ալերգիա է առաջացրել ոչ միայն տիկնոջ մոտ, այլև` կենցաղային իրերի վրա, որոնք նախկինում "առողջ" ու անվնաս էին:

Քաղաքակիրթ շատ երկրներում, օրինակ`Շվեդիայում, անհանդուժելի անճաշակություն և անկուլտուրական վարք է գնահատվում օծանելիքով տարվելը, նրա ոչ չափավոր օգտագործումը: Այնտեղ նման անձին չեն խնայում, որտեղ էլ լինի`անգամ ոչ թե ակնարկում, այլ ուղիղ երեսին ասում են ճշմարտությունը…

Ժամանակաակից բույրերը կազմված են ավելի քան 50 բաղադրատոմսերից: Իսրայելցի գիտնականները մեկ տարի տևած հետազոտությունից հետո պարզել են, որ 30 կամ ավելի բաղադրատոմսերից բաղկացած բուրանյութերից կազմված տարբեր խառնուրդները մեր հոտառության կողմից գործնականորեն ընկալվում են միատեսակորեն: Դրա համար էլ ինչ օծանելիք էլ որ օգտագործելու լինենք, միակ տարբերությունն այն է` կա օծանելիքի հոտ, թե` ոչ:

Ու եթե նախկինում անուշահոտությամբ պարուրված մեկն անցնում էր մեր կողքով` մեր հոտառությունն իսկույն ազդանշաններ էր ուղարկում ուղեղին` փորձելով որոշել հոտը, ապա այժմ թե դուխին ու թե տուալետի համար նախատեսված բուրահեղուկներն ունեն նույն հոտը, այն էլ` կոպտորեն շատ ու ավելորդ….