Ռուս դերասանուհի, «Նվիրիր կյանք» հիմնադրամի համահիմնադիր Չուլպան Խամատովան ռուսական «Նիկա» կինոմրցանակաբաշխության արարողության ժամանակ Քսենիա Սոբչակի սարքած աղմուկի պատճառով կրկին ստիպված է եղել հերքել այն լուրերը, որ ստիպողաբար է աջակցել ներկայիս ռուսական իշխանություններին:

Նա հայտարարել է, որ Վլադիմիր Պուտինին աջակցող նախընտրական տեսահոլովակում նկարահանվել էր սեփական կամքով:

«Բոլոր այն լուրերը, որ ինձ տանջել եւ ստիպել են, եւ արդուկ են դրել իմ կրծքին, իհարկե, չեն համապատասխանում իրականությանը: Դա իմ ընտրությունն էր: Ընդ որում, որ ես ապաքաղաքական մարդ եմ», – ասել է դերասանուհին BBC-ի հետ հարցազրույցում:

«Ես ուզում եմ այնպես անել, որ երեխաները շանս ունենան: Ես զզվում եմ այն մտքից, որ երեխաները կարող են մահանալ միայն այն բանից, որ նրանք փող չունեն, որ նրանք դեղ չունեն: Ինձ համար դա անընդունելի է», – հայտարարել է Խամատովան: Նա նշել է, որ, բարեգործությամբ զբաղվելիս կարելի է բախվել մեծ քանակությամբ ստորջրյա խութերի, որոնք կարելի է շրջանցել միայն գործող իշխանության հետ համագործակցելով, հայտնում է dni.ru-ն:

Հիշեցնենք, ապրիլի 8-ին Չուլպան Խամատովան եւ «Նվիրիր կյանք» հիմնադրամի նրա գործընկեր Դինա Կորզունը Կինեմատոգրաֆիական արվեստների ակադեմիայի «Նիկա» հատուկ մրցանակ էին ստացել: Սոբչակը հենց բեմի վրա անսպասելի դերասանուհուն հարցրել է, թե կաջակցեր նա Վլադիմիր Պուտինին, եթե բարեգործությամբ չզբաղվեր: Այդ ժամանակ Խամատովան չի պատասխանել հարցին` նշելով, որ ներկա է գտնվում «կինեմատոգրաֆիական տոնի», իսկ հանդիսատեսները Սուլել են Սոբչակին նրա արարքի համար: