Երեկ տեղի ունեցած ՀՀ առողջապահության նախարարին կից կոլեգիայի նիստի ժամանակ մինչ օրակարգի հարցերի քննարկումը Դերենիկ Դումանյանը բոլորին շնորհավորեց Հանրապետության տոնի կապակցությամբ՝ կոչ անելով անմասն չմնալ ազատ, անկախ եւ ավելի լավ Հայաստան կերտելու գործում, իսկ կոլեգիայի անդամ, ակադեմիկոս Վիլեն Հակոբյանին՝ Հայաստանի Հանրապետության նախագահի կողմից բարձր գնահատականի՝ Գիտության վաստակավոր գործչի կոչմանն արժանանալու համար։

Այնուհետեւ ՀՀ ԱՆ աշխատակազմի անձնակազմի կառավարման վարչության պետ Սամվել Սողոմոնյանը կոլեգիայի անդամներին ներկայացրեց ՀՀ բժշկական, հանրային առողջապահական եւ դեղագիտական մասնագիտությունների ցանկը։ Այն ստեղծվել է նախարար Դումանյանի հանձնարարությամբ ստեղծված աշխատանքային խմբի երեքամսյա աշխատանքի արդյունքում։

Ինչպես նախարարը տեղեկացրեց՝ Հայաստանում նման ցանկ վերջին անգամ հաստատվել է 17 տարի առաջ։ Անցած տարիների ընթացքում համակարգի պահանջները թեեւ բավական փոխվել են, սակայն մասնագիտությունների ցանկը միայն մասնակի փոփոխությունների է ենթարկվել եւ չի համապատասխանում այսօրվա պահանջներին։ Յուրաքանչյուր մասնագիտության տեղն ու դերն ընդհանուր ցանկում հնարավորինս ճիշտ որոշելու համար հարցը քննարկվել է շահագրգիռ բոլոր կազմակերպությունների, այդ թվում՝ նախարարության գլխավոր մասնագետների խորհրդի եւ մասնագիտական ասոցիացիաների հետ։ Միաժամանակ ուսումնասիրվել է տարբեր երկրների փորձը։

Արդյունքում առանձնացվել է ընդհանուր մասնագետների երեք մեծ խումբ՝ բուժական գործ, դեղագիտություն, ինչպես նաեւ հանրային առողջություն եւ կանխարգելիչ բժշկություն, 34 հիմնական եւ ավելի քան 90 նեղ մասնագիտություն։
«Այս հստակեցումը դիտարկվում է ինչպես մասնագիտությունների, այնպես էլ նրանց աշխատանքային բնութագրերի սահմանման առաջին քայլ։

Մյուս կողմից կարեւորվում է այն հանգամանքը, որ ցանկացած նեղ մասնագետ առաջին հերթին խորացած տիրապետի ընդհանուր մասնագիտությանը։ Այսօր մենք ամրագրում ենք համակարգին անհրաժեշտ մասնագիտությունների ցանկը։ Իսկ այդ կադրերի պատրաստման հարցերը կքննարկվեն հաջորդ փուլում՝ ՀՀ կրթության եւ գիտության նախարարության եւ ԵՊԲՀ—ի հետ»,–ասաց նախարարը։
Հարցի քննարկման ընթացքում եղան մի շարք առաջարկություններ։

Մասնավորապես խնդիր դրվեց ստոմատոլոգիան դիտարկել որպես ընդհանուր, իսկ սպորտային բժշկությունը՝ առանձին հիմնական մասնագիտություն։
Դերենիկ Դումանյանը հանձնարարեց մասնագետների ցանկը ներկայացնել նաեւ նախարարության հետ համագործակցող միջազգային կազմակերպություններին։ Ապա հաշվի առնելով նրանց կարծիքներն ու կոլեգիայում հնչած առաջարկությունները՝ որոշակի շտկումներ կատարելուց հետո մասնագիտությունների ցանկը ներկայացնել հաստատման։

Այնուհետեւ ԱՀԿ հայաստանյան գրասենյակի ղեկավար Թաթուլ Հակոբյանը ներկայացրեց ԱՀԿ 2012—2013թ. երկամյա գործողությունների ծրագրի շրջանակներում իրականացվող միջոցառումները։ Նա տեղեկացրեց նախարարության հետ համատեղ իրականացվող, ինչպես նաեւ առաջիկա ծրագրերի մասին։

Դերենիկ Դումանյանը շնորհակալություն հայտնեց արդյունավետ համագործակցության համար։ Նա նշեց, որ իր հրավերով շուտով Հայաստան կայցելի ԱՀԿ—ի եվրոպական տարածաշրջանի ղեկավարը, ում հետ մանրամասն կքննարկվեն առաջիկայում համագործակցության ընդլայնման հնարավորությունները։