Հայրենական ապրանքարտադրողների միության նախագահ Վազգեն Սաֆարյանը «դեղերից հեռու մարդ է»: Նման կերպ «Լիկվոր» դեղագործական ընկերության տնօրեն Սերգեյ Մաթեւոսյանն արձագանքեց NEWS.am-ի խնդրանքին` մեկնաբանել հայրենական ապրանքարտադրողների միության ղեկավարի այն հայտարարությանը, թե Հայաստանում մշակվել են նոր դեղեր, սակայն չեն արտադրվում:

Ըստ Ս. Մաթեւոսյանի` ինովացիոն, նորարարական դեղեր մշակելու համար 400-700 մլն դոլարի ներդրում է անհրաժեշտ: Աշխարհում միայն մի քանի անդրազգային ընկերություններ են ի վիճակի մշակել նորագույն դեղեր, մյուսները զբաղված են ջեներիկ դեղերի արտադրությամբ:

Հիշեցնենք, որ Վ. Սաֆարյանը մի առիթով նշել էր, թե Ա. Մնջոյանի անվան նուրբ օրգանական քիմիայի ինստիտուտը դեռեւս խորհրդային տարիներին 6-7 նոր դեղ է ստեղծել, սակայն դրանց արտադրությունը ոչ ոք չի ցանկանում կազմակերպել: Սակայն, Ս. Մաթեւոսյանի տեղեկացմամբ, այդ դեղերը մշակվել են 30-40 տարի առաջ, ու նորարարական համարվել չեն կարող: