Երևի չգտնվի մեկը, որին մայրը փոքր հասակում զգուշացրած չլինի շոկոլադի չարաշահման հետևանքների մասին: Ժամանակն է հասկանալու, թե որն է ճշմարտությունն ու որը առասպել: Տվյալներ կան, որ այս մթերքը ոչ միայն համեղ է, այլև շատ օգտակար:

Էներգիայի աղբյուր

Շոկոլադում պարունակվող ածխաջրերը մատչելի ու արագ այրվող էներգիա են տալիս, իսկ կակաոյի յուղի բաղադրության ճարպերն ավելի դանդաղ են յուրացվում` օրգանիզմին ապահովելով էներգիայով բավական երկար ժամանակ: Դրա համար շոկոլադ պետք է ուտել, եթե ակտիվ կյանք եք վարում, շատ եք շարժվում կամ էլ սպորտով զբաղվում: Հաշվեք, թե քանի կալորիա եք օրական ծախսում ու ըստ այդմ որոշեք ձեր օրվա շոկոլադի չափաբաժինը: Եթե ճիշտ հաշվարկեք, ապա շոկոլադից վնաս չի լինի:

Օգտակար է ուղեղին

Վաղուց նկատել են, որ շոկոլադը բարելավում է հիշողությունը և, ընդհանրապես, բարերար է ազդում ուղեղի աշխատանքի վրա: Գիտնականները կարծում են, որ կակաոյի ֆլավոնոլները կարող են բարերար ազդեցություն ունենալ ուղեղի աշխատանքի դժվարության ժամանակ, օրինակ` գերհոգնածության, վատ քնի: Շոկոլադի արդյունավետությունը նրանում է, որ այն լայնացնում է ուղեղի անոթները: Ուղեղի կարորագույն բաժիններին ավելի շատ արյուն, հետևաբար` լավ թթվածնամատակարարում է կատարվում:

Շոկոլադի կոֆեին

Շոկոլադի մի սալիկում պարունակվում է ընդամենը 30մգ կոֆեին: Համեմատության համար ասենք, որ մեկ գավաթ սուրճի մեջ այն 180 մգ է: 30 մգ-ն բավարար է սիրտանոթային ու նյարդային համակարգի թեթևակի խթանման համար: Կա կարծիք, որ կակաոն բարելավում է իմունային համակարգի աշխատանքը: Սակայն հիշեք, բուժման նպատակով ավելի լավ է օգտագործել դառը շոկոլադի բարձրորակ տեսակներ:

Օգտակար բուրմունք

Գիտնականները նույնիսկ շոկոլադի բույրն են օգտակար համարում: Այդ անկրկնելի բույրը պայմանավորված է շուրջ 40 եթերային միացություններով: Չի լինի մի մարդ, ում այդ բույրը տհաճ լինի: Ֆիզիոլոգները պարզել են,որ այն բարերար ազդեցություն է ունենում մարդու հոգեկանի վրա. գրգռվածությունն է թուլացնում, վերացնում: Հանգստացնում է և նույնիսկ վերականգնում հոգեկան հավասարակշռությունը: Իհարկե, դա կատարվում է այն պատճառով, որ շոկոլադի հետ են ասոցացվում հաճելի զգացումները, մեր մանկության հիշողությունները: Չէ որ հենց հոտերն են մարդկային զգացողություններից ամենաերկարակյացն ու կայունը:

Հակադեպրեսանտ

Երևի աշխարհի յուրաքանչյուր կին գեթ մեկ անգամ սիրային թախիծը փորձել է մեղմել շոկոլադով: Դա նույնպես իր գիտական բացատրությունն ունի: Կաթն ու սերուցքը բնական տրանկվիլիզատորներ են . հանգստացնում են նյարդային համակարգը, բարձրացնում տրամադրությունը և օգնում պայքարել անքնության դեմ:

Աֆրոդիզիակ

Շոկոլադը ամենահայտնի աֆրոդիզիակն է: Այն պարունակում է ֆենիլալանին անունով նյութ : Դա ամինաթթու է, որը նպաստում է օրգանիզմում էնդորֆինի բնական մշակմանը:

Կարիես ու պզուկներ

Այն առասպելը, որ շոկոլադից պուկներ են առաջանում ու ատամները փչանում, ամենատարածվածն է: Սակայն գիտնականները վստահեցնում են, որ ակնեն մաշկային որոշ գեղձերի գերֆունկցիայի պատճառով է առաջանում, ոչ թե շոկոլադի: Մի ուսումնասիրության ժամանակ մասնագետները համեմատեցին երկու խումբ. մի խմբին առաջարկվել էր շոկոլադի փոխարինիչ, մյուսին` 85% կակաոյի զանգվածով շոկոլադ: Արդյունքում երկու խմբերում փոփոխություններ էլ չկային: Շատ մասնագետներ էլ ասում են, որ շոկոլադը բերանի խոռոչի համար օգտակար է: Կակաոն պարունակում է հակամանրէային բաղադրիչներ, որոնք պայքարում են կարիեսի դեմ, իսկ շոկոլադի մեջ տանինի պարունակությունը խոչընդոտում է բերանի խոռոչում մանրէների բազմացմանը:

Այս ամենով հանդերձ, շոկոլադը բոլոր մթերքների նման օգտակար է չափավոր քանակով:

Ամեն մեկն ինքը պետք է որոշի իր օրական նորմը, այնուամենայնիվ այն չպետք է գերազանցի մեկ սալիկը: