ՀՀ տնտեսական մրցակցության պաշտպանության պետական հանձնաժողովի երեկվա նիստում գերիշխող դիրքի չարաշահման համար դեղորայքի ներկրմամբ եւ իրացմամբ զբաղվող «Կուրացիո» ընկերությունը տուգանվեց 10 մլն դրամով։

ՏՄՊՊ հանձնաժողով է դիմել դեղորայքի ներկրմամբ զբաղվող «Բեյբի Սիմ» ընկերությունը, տեղեկացնելով, որ մրցակից «Կուրացիո» ՍՊԸ—ն խոչընդոտում է իր գործունեությանը՝ թույլ չտալով մասնակցել դեղորայքի մատակարարման մի շարք մրցույթների։ Մասնավորապես, խոսքը վերաբերում է Երեւանի պետական բժշկական համալսարանի կողմից կազմակերպվող էնտերալ զոնդային սննդի (սննդի ընդունման դժվարություններ ունեցող կամ անգիտակից վիճակում գտնվող հիվանդներին զոնդի միջոցով տրվող հեղուկ) ձեռքբերման մրցույթներին։ Ընկերության դիմում—բողոքի հիման վրա հարուցվել է վարչական վարույթ, որի ընթացքում պարզվել է հետեւյալը. «Բեյբի Սիմ» եւ «Կուրացիո» ընկերությունները հանդիսանում են տարբեր արտադրողների կողմից արտադրվող՝ էնտերալ զոնդային սննդի ներմուծողներ Հայաստանում։
ԵՊԲՀ—ի կողմից կազմակերպված մրցույթներում «Բեյբի Սիմ» ընկերությունը առաջարկել է բարձր կալորիականությամբ էնտերալ զոնդային սնունդ՝ շատ ավելի էժան գնով, քան այն ձեռք է բերվում այդ ժամանակահատվածում «Կուրացիո» ՍՊԸ—ից։ ԵՊԲՀ—ը պատասխանել է, որ «Բեյբի Սիմը» պետք է մասնակցի իրենց կողմից կազմակերպվող գնման ընթացակարգերին, սակայն գնումները կազմակերպվել են այնպես, որ վերջինս հնարավորություն չի ունեցել մասնակցելու դրանց։

Մասնավորապես, զոնդային սննդի մասով մրցույթը կազմակերպվել է «Բուժ. սարքավորումներ» ապրանքի ներքո այն դեպքում, երբ այն բուժսարքավորում չէ։ Այս մրցույթին «Բեյբի Սիմը» մասնակցելու հրավեր չի ստացել, քանի որ գրանցված է եղել «Դեղորայք» եւ «Սննդամթերք» առաջարկող մասնակիցների ցանկում։

Վարույթի ընթացքում ի հայտ են եկել մի շարք փաստեր, որոնք վկայում են այն մասին, որ այն բոլոր դեպքերում, երբ «Կուրացիո» ընկերությունը բուժհաստատությունների կողմից հայտարարված պետական գնումների մրցույթներում հանդիսացել է միակ մատակարարը, հայտերում շատ բարձր գնային առաջարկ է ներկայացրել, իսկ այն դեպքերում, երբ մրցակից է ունեցել, դեղորայքը վաճառել է գրեթե ինքնարժեքին հավասար գնով՝ արհեստականորեն խոչընդոտելով մրցակից ընկերության մուտքը շուկա։
«Կուրացիո» ընկերությունը հատուկ խնամքի տակ գտնվող հիվանդների համար նախատեսված դեղորայքը վաճառել է ինքնարժեքից եռակի թանկ գնով։

Հանձնաժողովը ուսումնասիրել է նաեւ շուկայում «Կուրացիո» ՍՊԸ գնային քաղաքականությունը եւ բացահայտել, որ ընկերությունը, հանդիսանալով հանրապետությունում այս ապրանքների հիմնական ներմուծող եւ մատակարար, մշտապես օգտվել է իր մրցակցային առավելությունից եւ անկախ նրանից, որ այս ապրանքները իր մատակարարներից երբեմն զեղչով է ձեռք բերել կամ միջազգային շուկայում դրանց գները նվազել են, մշտապես նույն բարձր գներով է վաճառել հանրապետության դեղատներին եւ հիվանդանոցներին։ Մասնավորապես, մինչեւ զեղչի ստացումը ընկերության կողմից իրացվող «Նուտրիզոն սննդային թելիկներով 1 կկալ 500մլ.» ապրանքի ինքնարժեքը կազմում էր 2080 դրամ, իսկ մանրածախ իրացման գինը՝ 4000 դրամ։ Սակայն ընկերությունը ապրանքը կարողացել է ձեռք բերել զեղչով, ինչի արդյունքում ինքնարժեքը նվազել է մինչեւ 1380 դրամ, սակայն մանրածախ ցանցում գինը մնացել է անփոփոխ։ Այսինքն, ընկերությունը ինքնարժեքի նվազմանը համարժեք չի իջեցրել վաճառքի գները, ինչը մրցակցային օրենսդրության խախտում է։

Հանձնաժողովի որոշմամբ, շուկայում ունեցած գերիշխող դիրքի չարաշահման համար «Կուրացիո» ընկերությունը տուգանվեց 10 միլիոն դրամի չափով։ Բացի այդ, հանձնաժողովի առաջարկով վերջերս գնումների մասին օրենսդրության մեջ կատարված փոփոխությունների համաձայն, ընկերությունը կհայտնվի «սեւ ցուցակում» եւ մի քանի տարի շարունակ հնարավորություն չի ունենա մասնակցելու մրցութային գործընթացներին։