Ինչ է սրտամկանի ինֆարկտը

Սրտամկանի ինֆարկտը պատահում է այն ժամանակ, երբ սրտի մի մասը թթվածին չստանալու հետևանքով վնասվում է կամ մեռուկանում: Ինֆարկտների մեծ մասը տեղի է ունենում զարկերակների (արյան անոթների) խցանման հետևանքով: Այդ խցանումները հիմնականում առաջանում են աթերոսկլերոզից, որը զարկերակներում ճարպերի կուտակման հետևանք է:

Սրտամկանի ինֆարկտը կարող է առաջանալ նաև արյան մակարդուկների հետևանքով, եթե դրանք խցանվում են սրտի զարկերակների նեղ հատվածներում: Ավելի հավանական է, որ այդ մակարդուկները ձևավորվեն այն հատվածներում, որտեղ արդեն աթերոսկլերոզի պատճառով զարկերակի նեղացումներ կան:

Ինչպես կարող եք իմանալ, որ ձեզ մոտ սրտամկանի ինֆարկտ է սկսվել

Շատ մարդիկ մտածում են, որ սրտային ինֆարկտը սկսվում է անսպասելի և ուժեղ: Բայց փաստն այն է, որ սրտամկանի ինֆարկտների մեծ մասը սկսվում է թեթև ցավերով և անհարմարության զգացումով:
Սրտամկանի ինֆարկտի մասին կարող են ահազանգել հետևյալ նշանները.

• Կրծքավանդակում անհարմարության զգացում (կրծքավանդակի կենտրոնում ճնշման, սեղմվածության, լցվածության կամ ցավի զգացում)

• Անհարմարության զգացում մեկ կամ երկու ձեռքերում, թիկունքում, պարանոցում, ծնոտներում կամ ստամոքսում

• Շնչահեղձություն (հաճախ լինում է կրծքավանդակի անհարմարության զգացումից առաջ կամ դրա հետ միաժամանակ)

• Սառը քրտնարտադրություն, սրտխառնոց կամ գլխապտույտ

• Շաքարախտով հիվանդների և ծերերի մոտ սրտային ինֆարկտը կարող է ընթանալ առանց ցավերի

• Ցավը տևում է 20 րոպեից ավել և չի անցնում նիտրոգլիցերինի ընդունումից հետո

Ինչ պետք է անեք, եթե կարծում եք, որ ձեզ մոտ ինֆարկտ է սկսվել

• Զանգահարեք շտապ օգնություն: Մինչև օգնության գալը` ծամեք սովորական ասպիրինի մեկ հաբ: Ասպիրին չընդունեք, եթե դրանից ալերգիա ունեք

• Եթե կարող եք, գնացեք հիվանդանոց, որտեղ սրտամկանի ինֆարկտով հիվանդներին ցուցաբերվում է ժամանակակից խնամք

Ինչպես կարող եք խուսափել սրտամկանի ինֆարկտից

• Թողեք ծխելը.ձեր բժիշկը կարող է ձեզ օգնել (եթե չեք ծխում, ապա երբեք չփորձեք սկսել այն)

• Օգտագործեք առողջ սնունդ. արյան ճնշումը և խոլեստերինի մակարդակն իջեցնելու նպատակով սահմանափակեք ճարպերի և նատրիումի (աղի) օգտագործումը

• Եթե դուք շուտ գրգռվող եք, ապա սովորեք լարվածությունը թուլացնելու մեթոդներ

• Եթե ունեք շաքարախտ, ապա հսկեք արյան մեջ շաքարի քանակը

• Կատարեք ֆիզիկական վարժություններ.սա դժվար է թվում, եթե դուք որոշ ժամանակ չեք մարզվել, բայց փորձեք շաբաթական ամենաքիչը 4 անգամ 30 րոպե տևողությամբ կատարել աերոբիկ վարժություններ (դա արագացնում է սրտի աշխատանքը)

• Եթե ավելորդ քաշ ունեք, ապա անպայման կորցրեք այն: Ձեր բժիշկը կարող է քաշը կորցնելու լավ միջոցներ խորհուրդ տալ

• Եթե ունեք արյան բարձր ճնշում, ապա հսկեք այն: