Դեղագործության մրցունակության 5-րդ միջազգային համաժողովը մեկնարկեց հունիսի 14-ին` Մխիթար Հերացու անվան Երևանի պետական բժշկական համալսարանում:
Գիտաժողովի բացմանը առողջապահության նախարար Դերենիկ Դումանյանը նշեց, որ արդեն տասը տարվա կենսագրություն ունեցող Հայաստանի դեղ արտադրողների և ներմուծողների միությունը դեղարտադրության ոլորտի բարելավման ուղղությամբ լուրջ քայլեր է իրականացնում: Մեր երկրում շրջանառվող դեղերի 10%-ը տեղական արտադրության են, եւ մենք պետք է ամեն ինչ անենք դեղարտադրության ընդլայնման, ինչպես նաեւ պատշաճ արտադրական գործունեության պահանջների ապահովման ուղղությամբ Արմենպրես-ի հաղորդմամբ` ասաց նա` հավելելով, որ առողջապահության նախարությունը պատրաստ է աջակցել ոլորտի բոլոր նախաձեռնություններին ու ծրագրերին:

ԱՄՆ միջազգային զարգացման գործակալության հայաստանյան գրասենյակի տնօրեն Քարըն Հիլիարդի խոսքով` պետք է հնարավորին չափ ջանքեր գործադրել տեղական դեղարտադրությունը զարգացնելու ուղղությամբ:

Արդեն 6 տարի է` ԱՄՆ միջազգային զարգացման գործակալությունն աջակցում է ոլորտին` կենտրոնանալով արտադրական ընթացակարգերը միջազգային չափորոշիչներին համապատասխանեցնելու վրա,-ասաց նա:

Համաժողովին ներկայացվեցին Հայաստանում դեղագործության ոլորտի ձեռքբերումները, նոր զարգացումները, ինչպես նաև անդրադարձ կատարվեց համաշխարհային դեղագործական միտումներին:

Զեկույցներով հանդես եկան վրացական GMP ընկերության տնօրեն Գեորգի Անտաձեն, Ճապոնական Մինոֆագեն գիտահետազոտական լաբորատորիայի տնօրեն Հիդեո Ինուեն, ինչպես նաև Աստելլաս, Էգիս, Գեդեոն Ռիխտեր և Պֆայզեր ընկերությունների ներկայացուցիչները։

Համաժողովին զուգահեռ անցկացվում է նաեւ  դեղագործության ամենամյա Ֆարմա Արմենիա ԷՔՍՊՈ ցուցահանդեսը։

Դեղագործության մրցունակության 5-րդ միջազգային համաժողովը կազմակերպել է Հայաստանի դեղ արտադրողների և ներմուծողների միությունը ԱՄՆ Միջազգային զարգացման գործակալության Ձեռնարկությունների զարգացման և շուկայի մրցունակության («Ի-Դի-Էմ-Սի») ծրագրի և Արդյունաբերության զարգացման հիմնադրամի աջակցությամբ։

Համաժողովին ներկա են շուրջ 500 բժիշկներ, դեղատնային ցանցերի, տեղական և օտարերկրյա դեղագործական ընկերությունների աշխատակիցներ, գիտնականներ և փորձագետներ: