Առաջինը, բայց ոչ վերջինը. այսուհետ բժիշկներն էլ, այսպես ասած, «Օսկարներ» կստանան։ Առաջին քայլը արեցին երեկ՝ Ալ. Սպենդիարյանի անվան օպերայի եւ բալետի ազգային ակադեմիական թատրոնում՝ բուժաշխատողների օրվա կապակցությամբ։ Միջոցառմանը ներկա էր ՀՀ առաջին տիկին Ռիտա Սարգսյանը։

«Տարվա բժիշկ» ամենամյա մրցանակաբաշխության նախաձեռնողը ՀՀ առողջապահության նախարարությունն է։
Լրագրողների հետ զրույցում ՀՀ առողջապահության նախարար Դերենիկ Դումանյանը վստահեցրեց, որ միջոցառումը շարունակական է լինելու։ Նա տեղեկացրեց, որ մրցանակները բաշխելու համար աշխատել են եռաստիճան ընտրական հանձնաժողովներ. «Ամեն ինչ կատարվել է օբյեկտիվորեն։ Մրցանակներին արժանացողները հենց դահլիճում պետք է իմանան դրա մասին։ Ամբողջ հանրապետության տարածքից են թեկնածուներ ներկայացվել։ Մրցանակաբաշխությունը, համոզված եմ, կօգնի հիվանդներին լավագույններին ընտրել իրենց բժիշկներ։ Գեղեցիկ միջոցառում է, եւ բոլորը պետք է հավակնեն այդ մրցականերին»։ Նախարարն անձամբ ունեցել է ֆավորիտներ, սակայն ընտրությանը չի մասնակցել։ Իսկ հաղթողների անունները իմացավ միայն միջոցառման ժամանակ։ Անվանակարգերը 14—ն էին։ Սակայն 14—րդին ոչ ոք չարժանացավ։

Այսպես, «Մասնագիտությանը հավատարմության համար» անվանակարգում մրցանակի արժանացավ նեյրովիրաբույժ, Հայաստանում նեյրովիրաբուժության հիմնադիր Սուրեն Զոհրաբյանը։
«Տարվա բժշկական հաստատության ղեկավար» անվանակարգում մրցանակը ստացավ Աշոցքի «Տիրամայր Նարեկ» հիվանդանոցի բուժական մասի տնօրեն Սարգիս Վարդայնանը։
«Տարվա գյուղական ամբուլատորիայի բժիշկ» անվանակարգում մրցանակը ստացավ ՀՀ Սյունիքի մարզի Անգեղակոթի բժշկական ամբուլատորիայի բժիշկ Անիկ Գրիգորյանը,

«Տարվա տեղամասային բժիշկ» անվանակարգում՝ Արարատի մարզի Շահումյանի տեղամասային բժիշկ Աննա Բեգիջանյանը,
«Տարվա մանկաբույժ» անվանակարգում՝ Եղեգնաձորի «Ս. Աստվածամայր» բժշկական կենտրոնի մանկաբույժ Աննա Չոբանյանը։
«Տարվա թերապեւտ» անվանակարգում՝ Թալինի ԲԿ—ի թերապեւտ Անահիտ Խաչատրյանը,
«Տարվա շտապ բժշկական օգնության բժիշկ» անվանակարգում՝ Երեւանի քաղաքապետարանի «Շտապբուժօգնություն» ՓԲԸ թիվ 5 ենթակայանի վարիչ Անուշավան Վիրաբյանը,
«Տարվա երիտասարդ բժիշկ» անվանակարգում՝ նյարդավիրաբույժ Տիգրան Խաչատրյանը,
«Տարվա ռազմական բժիշկ» անվանակարգում՝ բուժծառայության փոխգնդապետ Արսեն Գրիգորյանը,
«Մարդու կյանք փրկած բացառիկ վիրահատություն կատարած վիրաբուժական թիմ» անվանակարգում՝ Մանկաբարձության եւ գինեկոլոգիայի ինստիտուտի վիրաբուժական թիմը,
«Վերադարձ կյանքին» անվանակարգում՝ «Ս. Գրիգոր Լուսավորիչ» ԲԿ անհետաձգելի բուժօգնության գծով փոխտնօրեն Գագիկ Մանուկյանը,
«Հատուկ անվանակարգում»՝ Հանրապետական հակատուբերկուլյոզային դիսպանսերի տնօրենի խորհրդական Լենո Աբգարյանը,

«Տարվա բարեգործական հիմնադրամ» անվանակարգում՝ «Նվիրիր կյանք» բարեգործական հիմնադրամը։
Երեւանի քաղաքապետ Տարոն Մարգարյանը, հանձնելով «Տարվա մանկաբույժ» մրցանակը, շնորհակալություն հայտնեց, որ օրվա հերոսները կան եւ որ հասարակության կողքին են. «Շնորհավորում եմ բոլորիդ»։

ՀՀ պաշտպանության նախարար Սեյրան Օհանյանն էլ հանձնեց «Տարվա ռազմական բժիշկ» մրցանակը։ Մինդեռ կարծում էր, որ այլ մրցանակ է հանձնելու, օրինակ՝ գինեկոլոգիայի բնագավառի։ Այսպես է մեկնաբանում. «Նրանց ձեռքով են ծնվում մեր հայրենիքին ծառայող տղաները»։ Ս. Օհանյանը բժշկի մասնագիտությունը եզակի է համարում, բայց ոչ միակ ոլորտը, որտեղ երդում են տալիս ծառայել մասնագիտությանը։ «Առողջապահական համակարգը մեկ համակարգ է։ Ե՛վ ռազմական բժշիկը, ե՛ւ քաղաքացիական բժիշկն աշխատում են ինտեգրված, այնպես, ինչպես փոխլրացնելով ստեղծեցին ռազմական բժշկությունը։ Խոնարհվում ենք բժիշկների առջեւ։ Մենք ի պաշտոնե, նաեւ ազատամարտի մասնակիցներս միշտ կապված ենք ձեզ հետ, որովհետեւ ձեր ուշադրության կենտրոնում ենք»,–ընդգծեց պաշտպանության նախարարը։

Իսկ մասնագիտությամբ բժիշկ կրթության եւ գիտության նախարար Արմեն Աշոտյանը կեսկատակ—կեսլուրջ բանավոր դիմում ներկայացրեց առողջապահության նախարարություն՝ հաջորդ տարի «Առողջապահության ոլորտում չաշխատող տարվա բժիշկ» անվանակարգ էլ ավելացնել, քանի որ բժշկական աշխարհը հարուստ կադրային ամրոց է եւ ներկայացուցիչներ ունի նաեւ մի շարք այլ ոլորտներում։

Անձամբ Սուրեն Զոհրաբյանը մասնագիտականից այլ ոլորտ չի տեղափոխվել։ Ասում է, որ հին բժիշկ է։ Արդեն յոթանասուն տարի ծառայում է բժշկությանը։ Ու շատ գոհ է։ Իր մասնագիտությունը ազնիվ մասնագիտություն է որակում. «Ժողովրդի համար է, մարդու համար է։ Եթե ճիշտ ես ծառայում՝ ինքդ գոհ ես մնում։ Ինքդ գոհ ես լինում, որ կյանքդ իզուր չես ապրում»։ Այնուհետեւ մտովի տեղափոխվեց այնտեղ, որտեղից որ սկսել է իր գործունեությունը։ «Իմ կյանքը սկսվեց ֆրոնտում։ Երբեք չէինք մտածում՝ երբ հանգստանալ, երբ աշխատել։ Աշխատում էինք բոլոր հիվանդների համար»,–ասում է, որ երբեք ոչ մի հիվանդի չի մերժել եւ աշխատել է գրեթե բոլոր գյուղերում։ Մեծ հպարտությամբ թվարկում է նաեւ այն բոլոր քաղաքներն ու երկրները, որտեղ մատուցել է իր մասնագիտական ծառայությունը։ Նա այսօրվա բժշկությունն էլ բարձր է գնահատում։

Իսկ մրցանակաբաշխությունը նրանով է կարեւորում, որ ժողովուրդը, պետությունը, նախարարությունը գնահատում են կատարված աշխատանքը։ «Այս միջոցառումը ոգեւորում է։ Թույլ է տալիս, որ տարիքը հաշվի չառնելով շարունակես աշխատել»։ Իսկ թե քանի՞ տարեկան է՝ նախ կատակեց. «Այստեղ այսքան կին կա, ինչպե՞ս ասեմ»։ Այնուհետեւ մեծ հպարտությամբ բարձրաձայնեց, որ 92 տարեկան է եւ մինչ օրս աշխատում է «Ս. Գրիգոր Լուսավորիչ» հիվանդանոցում։ Մրցանակը պահպանելու է իր առանձնասենյակում, որտեղ, համեստորեն խոստովանում է, նման շատ մրցանակեր կան՝ բոլորն էլ՝ մարդկանց ծառայելու արդյունքում։

Ահա թե ինչու ՀՀ ԱԺ առողջապահության, մայրության եւ մանկության հարցերի մշտական հանձնաժողովի նախագահ Արա Բաբլոյանը կարծում է, որ ճիշտ է ասված. բժիշկները մոմի պես այրվում են՝ լուսավորելով շրջապատին։ Բաբլոյանի համար բժշկի աշխատանքը շատ բարձր գործունեություն է, որը անհրաժետ է բոլորին։ Հարգում է բժիշկներին, բուժաշխատողներին. «Նրանք արժանի են մեծարման»։
Թամարա ՄՈՒՐԱԴՅԱՆ