Գիտնականները պարզել են, որ երկու գործոններ`աղի բարձր պարունակությամբ սննդակարգերն ու հելիկոբակտերիոզը (Helicobacter pylori մանրէով վարակվածությունը) երկու անգամ մեծացնում են ստամոքսի քաղցկեղի առաջացման վտանգը: Այս մասին հայտնում է միկրոկենսաբանության ամերիկյան ընկերության «Infekcion and immunity» հանդեսը:

Ամերիկացի մասնագետների դեռ ավելի վաղ իրականացված համաճարակաբանական հետազոտությունները ցույց էին տվել, որ աղի շատ օգտագործումն ինքնին ստամոքսի քաղցկեղի վտանգի գործոն է: Ինչ վերաբերում է Helicobacter pylori—ին, ապա այն առկա է աշխարհի բնակչության շուրջ կեսի օրգանիզմում, և իրեն կրողների 80 տոկոսի մոտ անցանկալի նշաններ ցույց չի տալիս: Իսկ 20 տոկոսի մոտ դեռևս անբացատրելի պատճառներով այն հրահրում է խոցային հիվանդության առաջացում, որոշների մոտ էլ այդ հիվանդությունը վերաճում է ստամոքսի ադենոկարցինոմայի…

Հետազոտության հեղինակները (ԱՄՆ Թենեսսի նահանգի Նեշվիլ քաղաքի Vanderbilt University scool of Medicine-ից), ձգտելով որոշել այդ առեղծվածին նպաստող գործոնները, «in vitro» գիտափորձերում պարզել են, որ բակտերիային շրջապատող միջավայրում աղի բարձր խտությունը Helicobacter pylori- ին ստիպում է ուժեղ կերպով սինթեզել CagA օնկոսպիտակուց, այսինքն` նրան տալիս է կանցերոգեն հատկություն և դարձնում ավելի վիրուլենտ:

Ինչպես գտնում են հետազոտության հեղինակները` ստացված արդյունքները միանշանակ խոսում են այն մասին, որ Helicobacter pylori- ի քաղցկեղածին էֆեկտը կապված է հենց աղի չափից շատ օգտագործման հետ: Այդ առեղծվածի հետևում կանգնած մոլեկուլյար մեխանիզմն առայժմ պարզ չէ: Հեղինակները մատնանշում են, որ կերաբաժնում աղի պարունակության մակարդակի նվազեցումը կարող է նպաստել ստամոքսի քաղցկեղով հիվանդացության ցուցանիշների իջեցմանը:

2013 թվականի մարտին էլ Յելի համալսարանի գիտնականների հետազոտությունը ցույց տվեց, որ սննդակարգում կերակրի աղի քանակությունը կարող է պայմանավորել իմունային համակարգի ակտիվությունը և հանգեցնել այնպիսի հիվանդությունների առաջացմանը, ինչպիսին` ցրված սկլերոզն է: