Գիտությունը քայլում է առաջ, և հետազոտությունները գնալով նոր բացահայտումներ ու հայտնագործություններ են անում, այդ թվում` շաքարային դիաբետի բուժման հարցում:

Ճապոնացի մասնագետներն առաջարկում են արյան մեջ գլյուկոզայի մակարդակի մշտական մոնիտորինգի նոր մեթոդ` դաստակի մաշկի տակ ներդնել արյան մեջ շաքարի մակարդակի բարձրացմանը շատ զգայնորեն արձագանքող և հատուկ ալիքներ ուղարկող նանոբյուրեղ: Այդ հատուկ ալիքները որսում է ձեռքի վրա ժամացույցի պես կապած սենսորային սարքը: Նոր մեթոդը դիաբետիկներին թույլ կտա գլյուկոզայի մակարդակի բարձրացման, ինչպես նաև նվազման դեպքում շատ արագ դեղամիջոց ընդունել:

Ամերիկացի գիտնականներն էլ դիաբետով հիվանդների համար մշակել են կոնտակտային լինզաներ, որոնց <լուսային բյուրեղներն> արյան մեջ գլյուկոզայի մակարդակը բարձրանալուն պես փոխում են իրենց գույնը: Բանն այն է, որ գլյուկոզայի բարձր մակարդակը բյուրեղին հաղորդում է կարմիր գույն, իսկ նորմալ մակարդակի դեպքում`կանաչ: Գիտնականներն առաջարկել են <լուսային բյուրեղները> տեղադրել կոնտակտային լինզաների ոչ մեծ հատվածի վրա: Մարդու արցունքի մեջ գլյուկոզայի մակարդակն այնքան է, որքան`արյան մեջ, այդ պատճառով էլ արցունքի բաղադրակազմով լինզան կարող է 15 րոպեում որոշել` մարդու համար կա վտանգ, թե` ոչ:Գլյուկոզայի բարձր մակարդակի դեպքում լինզայի վրա վառ լուսավորված կետ է հայտնվում, և հիվանդը կարող է հայելուն նայելով իմանալ` ինչ վիճակում է այն:

Քանի որ գլյուկոմետրերը կարող են նաև ճիշտ տվյալներ արձանագրել ջերմիջեցնող ու ցավազրկող պարացետամոլ ընդունած հիվանդների մոտ, գերմանացի գիտնականները մշակել են նոր գլյուկոմետր, որում այդ հանգամանքը հաշվի է առնված:Այժմ չափման դեպքում արդյունքները չեն խեղաթյուրվում, ինչը հույժ կարևոր է ինքնազգացողության գնահատականի համար: Նոր գլյուկոմետի օգտակար հատկություններից է նաև գաղտնագրի բացակայութունը.նախկինում նոր գլյուկոմետր գնելիս հիվանդը սարքի մեջ հատուկ գաղտնագիր էր հավաքում, իսկ այժմ այն ավելի պարզեցված է, ինչը շատ գնահատելի է նոր տեխնիկայից այնքան էլ լավ գլուխ չհանող տարեց մարդկանց համար:

Սթրեսը դիաբետով հիվանդների մոտ նշանակալիորեն դանդաղեցնում է գլյուկոզայի մակարդակի նվազումը և շաքարային դիաբետի բուժման արդյունավետությունը. Սա շվեյցարացի գիտնականների կարծիքն է: Հատկապես վտանգավոր են ուտելուց հետո ի հայտ եկող նյարդային ցնցումները: Բացի շաքարի մակարդակի վրա ազդեցությունից, սթրեսները բարձրացնում են զարկերակային արյան ճնշումը, ավելացնում սրտի կծկումների հաճախականությունը: Դա շատ կարևոր է երկրորդ տեսակի շաքարային դիւաբետով հիվանդների համար, քանզի նրանց մոտ հիվանդությունն ընթանում է բարձր զարկերակային ճնշման և սրտի իշեմիկ հիվանդության հետ <միասին>:

Քանի որ կյանքն առանց սթրեսների չի լինում, անհրաժեշտ է սովորել դրանց ճիշտ արձագանքել: Մասնագետներն առաջին հերթին հոգեթերապիա և աուտոտրենինգ են խորհուրդ տալիս, իսկ հետո `հանգստացնող դեղորայք:

Տարեց հիվանդների մոտ դիաբետի բուժման հատուկ ու հետաքրքիր մեթոդներ են առաջարկել նաև ռուս ու եվրոպացի գիտնականները: Նրանք գտնում են, որ անհրաժեշտ է 35-45 տարեկան մարդկանց համար դեղամիջոցներ ընտրել այնպես, որպեսզի գլյուկոզայի ու գլիկոլիզացված հեմոգլոբինի ցուցանիշները լինեն նորմային ավելի մոտ: Միանգամայն ուրիշ պետք է լինի առավել տարեց մարդկանց բուժման մարտավարությունը: Վերջիններիս շաքարային դիաբետի խիստ ագրեսիվ բուժումը չի հանգեցնում կյանքի երկարատևության, դրա համար էլ նրանց դեպքում կարևորը զարկերակային նորմալ ճնշմանն ու խոլեստերինի մակարդակին հետևելն է, իսկ գլյուկոզայի ցուցանիշները կարող են նորմայից մի քիչ բարձր լինել: