Ֆրանսիայի Լիոն քաղաքի Քաղցկեղի հետազոտման միջազգային գործակալության գիտական խումբը պարզել է,որ տարբեր բուժելի վարակների պատճառով առաջացրած քաղցկեղից տարեկան 2 մլն մարդ է մահանում, գրում է«Բի Բի Սի»-ն:

Ուսումնասիրելով աշխարհի 184 երկրներում քաղցկեղից մահացությունների տվյալները` մասնագետները պարզել են, որ դրանց զգալի մասի համար «պատասխանատու» են բուժելի վարակների 4 հիմնական տեսակները` պապիլամիտոզը, հելիկոբակտեր պիլորին և հեպատիտի B-ի և C-ի վարակները: Դրանք տարեկան 2 մլն մարդկանց մոտ լյարդի, կոկորդի և աղիքների քաղցկեղի պատճառ են դառնում:

Վարակների հետևանքով առաջացած քաղցկեղի տոկոսը, ի տարբերություն զարգացած երկրների, 3 անգամ ավելի բարձր է տնտեսապես ավելի թույլ երկրներում:

«Միջազգային մակարդակով ամեն ինչ պետք է արվի բուժելի վարակներից առաջացող քաղցկեղի թիվը կրճատելու համար: Անչափ կարևոր է, որ ամբողջ աշխարհում այս վարակները կանխարգելող պատվաստանյութերը պարտադիր կիրառվեն`հնարավորություն տալով զգալիորեն կրճատել այդ հիվանդացությունների քանակը»,- նշել է գիտական խմբի ղեկավար Քեթրին դե Մարտելը: