Երեկ մեկնարկեց «Հոգեկան առողջություն եւ հոգեկան խանգարում. կիզակետում Եվրասիան է» թեմատիկ գիտաժողովը։ Համաշխարհային հոգեբուժական ասոցիացիան այն կազմակերպել է Հայկական հոգեբուժական ասոցիացիայի (ՀՀԱ), Հայկական բժշկական ասոցիացիայի եւ ՀՀ ԱՆ Ս. Խ. Ավդալբեկյանի անվան առողջապահության ազգային ինստիտուտի հետ համատեղ։

Գիտաժողովի մոտ 300 մասնակիցների թվում աշխարհի տարբեր երկրներից ժամանած ճանաչված մասնագետներ են՝ Համաշխարհային հոգեբուժական ասոցիացիայի նախագահ Պեդրո Ռուիզը (ԱՄՆ), Հոգեսոցիալական վերականգնման համաշխարհային ասոցիացիայի նախագահ Աֆզալ Ջավեդը (Մեծ Բրիտանիա), Դինամիկ հոգեբուժության համաշխարհային ասոցիացիայի նախագահ Նիկոլայ Նեզնանովը (Ռուսաստան), Սոցիալական հոգեբուժության համաշխարհային ասոցիացիայի նախկին նախագահ Դրիսս Մուսավին (Մարոկո), Ընտանեկան բժիշկների համաշխարհային կազմակերպության նախագահ Մայքլ Քիդը (Ավստրալիա) եւ ուրիշներ։

Գիտաժողովի Գ. Սունդուկյանի անվան ազգային ակադեմիական թատրոնի դահլիճում կայացած բացման հանդիսությանը ներկա էր ՀՀ առողջապահության նախարար, պրոֆեսոր Դերենիկ Դումանյանը։ Ողջունելով գիտաժողովի մասնակիցներին, նախարարը մասնավորապես ասաց.
—Առողջապահության համաշխարհային կազմակերպության կարգախոսը վկայում է՝ «Չկա առողջություն առանց հոգեկան առողջության»։ Մինչդեռ հանրահայտ փաստ է, որ երրորդ հազարամյակը նոր մարտահրավերներ է դնում ինչպես ընդհանուր առողջապահության, այնպես էլ՝ հոգեկան առողջության պահպանման առջեւ։

Ամբողջ աշխարհում գնալով մեծանում է հոգեկան առողջության խնդիրներով պայմանավորված բեռը պետությունների ու հասարակությունների վրա։ Հենց այստեղ է, որ բավական մեծ դերակատարում կարող են ստանձնել գիտական եւ մասնագիտական կազմակերպությունները՝ նոր հնարավորություններ ու մեխանիզմներ առաջարկելով մարդկության առջեւ ծառացած գլոբալ հիմնախնդիրների լուծման ուղղությամբ։

Վստահ եմ, որ այս գիտաժողովին մասնակցող ոլորտի ճանաչված կլինիցիստները, գիտնականներն ու կազմակերպիչները, հենվելով ժամանակակից ձեռքբերումների եւ հոգեկան առողջության ոլորտի զարգացման փորձի վրա, լուրջ քննարկումների արդյունքում կհստակեցնեն այն մոտեցումներն ու մեխանիզմները, որոնք կնպաստեն ոլորտի առջեւ ծառացած նոր մարտահրավերներին դիմակայելուն, ինչպես նաեւ ի զորու կլինեն նպաստելու բարեփոխումների անհրաժեշտություն ունեցող համակարգերի առաջընթացին։

Հավելենք, որ գիտաժողովի ծրագրում ընդգրկված են 8 պլենար դասախոսություն, 27 սիմպոզիում, ընդհանուր առմամբ 120—ից ավելի զեկույց։ Հոգեկան առողջության ոլորտի բազմաբնույթ հարցերի շարքում ներառված են նաեւ զեկուցումներ Հայոց ցեղասպանության, երկրաշարժի երկարատեւ հետեւանքների, միջնադարյան շրջանի հոգեթերապիայի հայկական մոտեցումների վերաբերյալ։
Նախատեսվում են նաեւ համաշխարհային ասոցիացիաների նախագահների խորհրդակցություն եւ «Երեւանյան հռչակագրի» ստորագրում։

Անի ԳՐԻԳՈՐՅԱՆ