Առողջապահության ոլորտում ուշը «նուշ» չէ. որքան վաղ հայտնաբերվի հիվանդությունն, այնքան դրա կանխումը եւ բուժումն արդյունավետ կլինեն։ Խոսքը նաեւ ուղեղի կաթվածի մասին է։

Այն վտանգավոր հիվանդություններից է, որը հանգեցնում է հաշմանդամության, նաեւ մահացության մեծ թվեր է գրանցում։ Բայց մասնագետները վստահեցնում են, որ հիվանդությունը սկսվելուց 4.5 ժամվա ընթացքում, եթե հիվանդին տեղափոխեն կլինիկա եւ համապատասխան օգնություն ցուցաբերվի՝ բուժման արդյունավետությունն առավել մեծ կլինի։

Կաթվածի թեման առավել մանրամասն քննարկվեց Երեւանի Մխիթար Հերացու անվան պետական բժշկական համալսարանում։ Այստեղ երեկ մեկնարկեց «Կաթվածի բուժում—2013» խորագրով երկօրյա միջազգային գիտաժողովը։

Այն նվիրված է գլխուղեղի արյան շրջանառության սուր խանգարումներին։ Միջոցառման ընթացքում ԱՄՆ—ից եւ Կանադայից հրավիրված միջազգային ճանաչում ունեցող մասնագետները կկարդան հատուկ ծրագրով մշակված դասախոսություններ։

ՀՀ առողջապահության նախարար Դերենիկ Դումանյանը բացման խոսքում նշեց, որ 3 տարի առաջ ԵՊԲՀ—ի Հերացու թիվ 1 հիվանդանոցային համալիրում հիմնադրվեց անոթային նյարդավիրաբուժության մասնագիտացված կենտրոն՝ հագեցած ժամանակակից սարքավորումներով եւ արտերկրում վերապատրաստված մասնագետներով։

Այդուհանդերձ այս ոլորտում միջազգային առաջատար փորձի ներդրումը, նախարարի գնահատմամբ, շարունակում է մնալ կենսական անհրաժեշտություն. «Այս գիտաժողովը կարեւորում եմ հատկապես նրանով, որ թեւակոխում ենք նոր փուլ՝ նպատակ ունենալով միջազգային առաջատար փորձի ներդրումով Հայաստանում ստեղծել գլխուղեղի բոլոր անոթային հիվանդությունների մասնագիտացված տարածաշրջանային կենտրոն, որը կարող է սպասարկել նաեւ հարեւան երկրների ազգաբնակչությանը»։

Ըստ Դումանյանի ներկայացրած տվյալների՝ տարեկան ունենում ենք 5.5 հազար ուղեղի կաթվածի դեպք։ Հիվանդների 50 տոկոսի կյանքը, սակայն, փրկել չի հաջողվում։ Իսկ զարգացած երկրներում մահացության ցուցանիշը 20 տոկոս է։ Մենք էլ 20 տոկոսին հասնելու ուղղությամբ ենք գնում։ Դումանյանն ասում է, որ այդ ուղղությամբ պետք է շատ աշխատենք։ Բայց դժվավարանում է ասել ցուցանիշին հասնելու ժամանակաշրջանը։
Իսկ թե որքա՞ն արժե հիվանդության բուժումը, նախարարը նշեց, որ ստենդների արժեքը 500—ից մինչեւ 5000 դոլար է։ Այս դեպքում նույնպես ստենդներ են օգտագործվում եւ դրանց գները տարբեր են։
ԵՊԲՀ ռեկտոր Միքայել Նարիմանյանի խոսքերով, կաթվածով պայմանավորված խնդրի արդիականությունը վիճակագրություն է ապացուցում։

Ընդհանուր եւ էնդովասկուլյար նյարդավիրաբուժության կլինիկայի ղեկավար Ռուբեն Ֆանարջյանը ներկայացնելով վիճակագրությունը՝ ասաց, որ թվերը լուրջ իրավիճակի մասին են խոսում. «Դրա համար էլ որոշում կայացվեց ստեղծել համապատասխան կենտրոն, որը հագեցած է ժամանակակից սարքավորումներով»։

Թամարա ՄՈՒՐԱԴՅԱՆ