ԱՆ-ն մշակել է նոր օրենք, որը, հնարավոր է, նվազեցնի տնային պայմաններում աբորտների թիվը

Աշխարհում լայն տարածում ունի դեղորայքային աբորտը, որը հղիության ընդհատման անվտանգ մեթոդ է: Բայց. դեղորայքային աբորտը պետք է կատարվի բժշկի հսկողության տակ, միայն դա կարող է երաշխավորել կնոջ առողջությունը: Այս մասին լրագրողների հետ հանդիպմանն այսօր հայտարարեց ԱՆ Մայրական և վերարտադրողական բաժնի պետ Գայանե Ավագյանը:

Պաշտոնյայի խոսքով, միայն գրագետ հետազոտվելու ու գրագետ հսկողության տակ աբորտ անելու դեպքում կինը կարող է հանգիստ լինել, որ կրկին կկարողանա մայրանալ. «Սակայն, դժբախտաբար, կանայք Հայաստանում հաճախ ինքնուրույն դիմում են հղիության ընդհատման «Սայտոտեկի» միջոցով»,- նշեց Գ.Ավագյանը:

Panorama.am-ի հարցին ի պատասխան, որ այդ դեղորայքի վտանգավորության ու այն ազատ վաճառքում լինելու մասին տարիներ շարունակ ահազանգում են թե լրատվամիջոցները, թե նույն ԱՆ-ն, ե՞րբ, ի վերջո, նախարարությունը կկարողանա արգելել դրա ազատ վաճառքը, տիկին Ավագյանն ասաց, որ արգելել վաճառքը չեն կարող, քանի որ նշված դեղը հատուկ հսկողության դեղերի շարքին չի պատկանում: Բայց ելք, այդուհանդերձ, կարծես գտել են. «Դեղն օգտագործվում է այլ նպատակներով, այն է` ստամոքսի խոցի բուժման համար և այլն, հետևաբար արգելելը դժվար է: Բայց նախարարությունը նոր օրենքի նախագիծ է մշակել, որը կսահմանի, որ այդ դեղորայքը բաց կթողնվի միմիայն բժշկի դեղատոմսով»,- տեղեկացրեց ԱՆ ներկայացուցիչը:

Գ.Ավագյանը հերթական անգամ զգուշացրեց` տնային պայմաններում, առանց բժշկի հսկողության հղիության ընդհատումը վտանգավոր է, կարող է ուղեկցվել արյունահոսությամբ և այլ խնդիրներով, որոնք, ցավոք, կարող են նաև անդառնալի լինել:

Վերադառնալով օրենքի նախագծին, նա նշեց, որ այն վերաբերելու է ընդհանրապես դեղերի շրջանառությանն ու այդ դաշտին, որում նաև կնշվի, թե որ դեղերն են այսուհետ դեղատոմսով բաց թողնվելու. «Հետևաբար, երբ դա հաստատվի, մենք մեծ հսկողություն կսահմանենք դեղատների նկատմամբ»,- ասաց նա ու հավելեց, որ ըստ ամենայնի, օրենքի նախագիծը առաջիկայում արդեն իսկ կդրվի ԱԺ շրջանառության մեջ: