ՀՀ առողջապահության նախարարության և Նեոնատալ բժշկության հայկական ասոցիացիայի համատեղ ուժերով այսօր կայացավ «Վիտամին Կ-ի կիրառումը նեոնատալ բժշկության մեջ» թեմայով խորհրդաժողով նորածինների բժշկական օգնությունն իրականացնողների և առողջապահության կազմակերպիչների համար:

Խորհրդաժողովում անդրադարձ կատարվեց վիտամին Կ-ի կիրառման անհրաժեշտությանը, գործելակարգին և քննարկվեցին առկա խնդիրները: Նաև ներկայացվեց ծնողների համար նախատեսված «Վիտամին Կ-ի անհրաժեշտությունը նորածինների համար» հուշաթերթիկը:

Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, երեխաների բուժօգնության կազմակերպումն առողջապահության համակարգի գերակա խնդիրներից ու առանցքային ուղղություններից մեկն է: Այս առումով կարևորվում են հիվանդությունների կանխարգելմանն ուղղված ծրագրերը: Վերջիններս հաճախ հնարավորություն են տալիս կանխել այնպիսի ախտաբանական վիճակներ, որոնց զարգացումը շատ դեպքերում բերում է հաշմանդամության, երբեն էլ` մահվան:

Բոլոր այն երկրներում, որտեղ նորածինների մոտ մասսայաբար կիրառվում է վիտամին Կ-ն, կանխվում են հեմոռագիկ հիվանդությամբ պայմանավորված ուղեղի արյունազեղումների դեպքերը: