Ցանկացած երկիր իր շուկան պաշտպանում է դեղաբանական կոմիտեների միջոցով: Այսօր լրագրողների հետ հանդիպման ժամանակ նման տեսակետ հայտնեց ԳԱԱ-ին կից Օրգանական և դեղագործական քիմիայի գիտահետազոտական կենտրոնի տնօրեն Վիգեն Թոփուզյանը: Նրա խոսքով' Հայաստանում դեղարտադրության բնագավառում մի վիճակ է ստեղծվել, որ հակասում է բոլոր օրենքներին:

Տնօրենի խոսքով` թույլտվությունը պիտի տա դեղաբանական կոմիտեն: Սակայն ըստ իրենց տեղեկությունների` հայրենական արտադրողներից ոչ ոք չունի այդ թույլտվությունը: Անհրաժեշտ է սկզբում որոշել խաղի կանոնները:

Անդրադառնալով եվրոպական ստանդարտներին Վիգեն Թոփոզյանը նշեց, որ եվրոպական ստանդարտներն ուրիշ են, ճապոնականն ու ամերիկյանը՝ բոլորովին այլ: Դեղի տուփի վրա նշված ժամկետը մեկ օր անգամ իրավունք չունեն երկարացնելու, դրա համար արտադրողը պիտի համապատասխան խմբաքանակի դեղը հետ վերցնի, ստուգի, համոզվի, որ որակը չի կորել, դիմի, թույլտվություն ստանա, նոր շարունակի:

Թոփուզյանի խոսքով` դեղարտադրությունն ունի օրենքներ, որոնց պետք է հետևել: Ինքը, որպես քաղաքացի, իրավունք չունի որևէ մեկի ձեռքը բռնելու, բայց հաճույքով կբարձրաձայնի, երբ ձեռքի տակ փաստեր ունենա: