Հայաստանն առաջիկա հինգ տարիներին ինսուլին ձեռք կբերի ավելի ցածր գներով, ինչը, ըստ ՀՀ վարչապետ Տիգրան Սարգսյանի, պատմականորեն ամենացածր գինն է:

Այսօր կառավարության հերթական նիստում առողջապահության նախարար Դերենիկ Դումանյանը ներկայացրեց Հայաստանի Հանրապետության կարիքների համար ինսուլին դեղի գնման 2013-2019 թվականների գործընթացը կազմակերպելու և Հայաստանի Հանրապետության կառավարության 2013 թվականի հունիսի 20-ի N 663-ՆԳ որոշումն ուժը կորցրած ճանաչելու մասին որոշումը: Այսպիսով՝ առաջարկվում է 2013-2019 թվականների կարիքների համար առողջապահության նախարարության կողմից ինսուլին դեղի խմբաքանակների գնումներն իրականացվելու համար բանակցային ընթացակարգ կիրառել առանց գնումների մասին հայտարարությունը նախապես հրապարակելու:

«Կառավարությանը ցանկանում եմ տեղեկացնել, որ տարվա սկզբին մենք ինսուլին դեղը գնել ենք տասներկու դոլարին համարժեք դրամով։ Մենք երեք խոշոր միջազգային ընկերությունների հետ, որոնք այս ոլորտում համարվում են ամենահայտնի ձեռնարկությունները, բանակցությունների միջոցով ներկայացրել ենք մեր պայմանները և պահանջները և ստացել ենք երեք կազմակերպություններից առաջարկություններ: Մի ընկերությունն առաջարկել է հինգ դոլար, մյուս ընկերությունը`4,5, իսկ մյուսը` 3,3 դոլար ինսուլինի մեկ սրվակի դիմաց»,- ներկայացրեց Դերենիկ Դումանյանը:

Նա հայտնեց, որ եթե վերջին առաջարկված գնով ձեռք բերվի, ապա տարվա կտրվածքով շուրջ երեք հարյուր միլիոնից ավելի դրամի տնտեսում կունենան, առավելևս, որ ընկերությունն առաջարկում է նաև վերապատրաստման դասընթացներ, դիաբետի դպրոցների հիմնում և այլ ծրագրեր:

Վարչապետը նկատեց, որ առաջարկված գինը պատմականորեն ամենացածր գինն է: «Մենք ընտրել ենք լավագույն տարբերակը, որը ամենացածր գինն է տալիս և ծրագրերի առումով ամենաընդունելին է»,- ասաց նախարարը և ավելացրեց, որ պայմանագիրը հինգ տարի ժամկետով են կնքելու: