ՏՄՊՊՀ-ն նախազգուշացրեց մի շարք բրենդային խանութների

Բազմաթիվ խանութներում դիմապակու վրա փակցված զեղչերի հայտարարությունները իրականությանը չեն համապատասխանում: Սա նորություն չէ հայ սպառողի համար, իսկ զուտ իրավական տեսանկյունից՝ սա անբարեխիղճ մրցակցություն է: ՀՀ տնտեսական մրցակցության պաշտպանության պետական հանձնաժողովը լայնածավալ ուսումնասիրություն է իրականացրել այս առումով, եւ այսօր՝ հոկտեմբեի 25-ին հրապարակեց արդյունքները: Մոտ մեկ տասնյակ խանութներ, այդ թվում՝ հայտնի բրենդային խանութներ խիստ նախազգուշացվեցին՝ հասարակությանը ոչ ճիշտ գովազդների միջոցով մոլորեցնելու համար; Այդ խանութներն են՝ «Ալիսա-Հայկ» ընկերություն («Գեսս» խանութ-սրահ), «Բեներիկ» ընկերություն («Բեյսիկ Հաուս» խանութ-սրահ), «Գոհար-Անի» ընկերություն («Կաշառել» խանութ-սրահ), «Լիգա Էլ Ընդ Ջի» ընկերություն («Օրկեստրա»), «Լիոնելա» ընկերություն («Մի-մի» խանութ-սրահ), «Մարտին-ՊՕ» ՍՊԸ («Բուգատտի» խանութ-սրահ), «Նավավան» ընկերություն («Բրենդաութլեթ» խանութ-սրահ),«Ռուժ Բուտե» («Ռուժ» խանութ-սրահ), «Սավոյ» ՍՊԸ («Շոկոլադ» խանութ-սրահ), «Վարդալ Ֆարմ» դեղատուն, «Վենետիկ Սթայլ» ընկերություն («Վենեցիա» խանութ-սրահ), «Վիա Արտիս» ընկերություն («Մոսկինո» խանութ-սրահ):

ՏՄՊՊՀ նիստի ընթացքում անբարեխիղճ մրցակցության վերահսկողության բաժնի պետ Հայկ Վարդանյանը ներկայարեց մի շարք օրինակներ: «Բեյսիկ հաուզ» խանութը փակցրել է 70% զեղչի հայտարարություն, սակայն իրականում կիրառում է 50%, «Կաշառելը»՝ փակցրել է 50%, կիրառում է 20-30%: «Մոսկինո» խանութ սրահը հայտարարել է 50% զեղչ, սակայն միայն որոշ ապրանքների համար կիրառում է 20-30%: Ընդհանրապես՝ խանութներից շատերն են այդ հնարքը կիրառում. հայտարարում են ընդհանոր զեղչ, սակայն այն կիրառում են ապրանքների մի մասի վրա:

ՏՄՊՊՀ նիստում ներկա մի քանի ընկերությունների ներկայացուցիչներ հայտարարեցին, որ ընդունում են սխալը, ու այն պատճառաբանեցին օրենքի թերըմբռնմամբ: Բոլոր այդ խանութներում անմիջապես վերացվել է խախտումը, իսկ ՏՄՊՊՀ-ն պատրաստակամություն հայտնեց հետագայում եւս իրականացնել ստուգումներ: