Դեղերի նկարագրություն
Կտեղադրվեն նախարարին ուղղված հարցերի արկղեր
ՀՀ առողջապահության նախարար Դերենիկ Դումանյանի մոտ տեղի ունեցավ համակարգում ֆինանսական միջոցներն առավել նպատակային ծախսելու, ինչպես նաև ոլորտում առկա բացթողումների և անառողջ երևույթների դեմ պայքարին ուղղված աշխատանքային հերթական խորհրդակցությունը։Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, նախ ըստ առանձին ոլորտների ներկայացվեցին նախարարի հանձնարարությամբ վերլուծությունների հիման վրա մշակված ծրագրային առաջարկություները` ֆինանսական միջոցների արդյունավետ և թափանցիկ ծախսման, վերահսկման գործուն մեխանիզմների ներդրման ուղղությամբ։
Մեծապես կարևորվեց պետության կողմից երաշխավորված անվճար բժշկական օգնության տրամադրման շրջանակներում քաղաքացիների հետ անհատական պայմանագրերի կնքման հարցը, ինչը պաշտոնական փաստաթուղթ կդառնա քաղաքացու ձեռքում:
Ոլորտում գործունեության թափանցիկությունն ապահովելու նպատակով խոշոր բժշկական կենտրոնների հասարակայնության հետ կապերի պատասխանատուներն այսուհետև առավել մեծ ուշադրություն պետք է դարձնեն իրենց պաշտոնական կայքէջերին, որտեղ պարտադիր կարգով պետք է զետեղված լինի տեղեկատվություն հիվանդների ամենօրյա շարժի, մատուցվող ծառայությունների և այլ հարցերի վերաբերյալ:
«Կան տարբեր խնդիրներ, որոնց լուծումներն առաջնային են և պետք է հստակ կարգավորվեն մինչև տարեվերջ: Անհրաժեշտ է հստակեցնել համավճարի ինստիտուտի ընդլայնման հարցը, մշտական ուշադրության կենտրոնում պահել չհիմնավորված ուղեգրումների խնդիրը, որի կանոնակարգման համար անհրաժեշտ է մշակել առանձին չափորոշիչներ»,-շեշտեց Դերենիկ Դումանյանը` հավելելով որակի վերահսկման առանձին մեխանիզմների մշակման անհրաժեշտությունը:
Նախարարը կարևորեց բժշկական կազմակերպությունների վարկանիշային աստիճանի մշակման հարցը` նշելով, որ առանձին չափորոշիչով պետք է սահմանել բժշկական հիմնարկի որակավորման հարցը, որը հնարավորություն կտա հստակ ուրվագծել լավագույն հիմնարկները, որոնց առավելություններ կտրվեն պետության կողմից:
Հանրապետության խոշոր բժշկական կազմակերպություններում կտեղադրվեն ՀՀ առողջապահության նախարարին ուղղված հարցերի արկղեր, որտեղ քաղաքացիները կկարողանան անդրադառնալ այն խնդիրներին, որոնց բախվել են բժշկական այս կամ այն ծառայությունից օգտվելիս:
Կարևորվեց նաև բուժհաստատություններում լիազոր ներկայացուցիչներ ունենալը, վերջիններս օպերատիվ կարձանագրեն առկա խնդիրները:
Նախարարը հանձնարարեց ստորաբաժանումների և առանձին ծառայությունների ղեկավարներին խմբավորել ծրագրային նախնական առաջարկությունները և ամփոփ ներկայացնել` մեծապես կարևորելով անկախ հանձնաժողով ստեղծելու անհրաժեշտությունը, որտեղ կընդգրկվեն բոլոր շահագրգիռ կողմերը, այդ թվում` հիվանդների և բժիշկների շահերը պաշտպանող հասարակական կազմակերպությունների ներկայացուցիչներ:
