Ամերիկյան «Սուրվանտա» դեղամիջոցի կիրառման շնորհիվ 2013 թվականի անցած ժամանակահատվածում Հայաստանում հաջողվել է փրկել 52 վաղածին երեխայի կյանք։

«Հայաստանում «Սուրվանտա» դեղամիջոցի կիրառման արդյունքները շնչառական դիստրես—սինդրոմով վաղածին երեխաների բուժման մեջ» թեմայով հրավիրված համաժողովի շրջանակում այս մասին հայտնեց մանկական անեսթեզիոլոգ—ռեանիմատոլոգ Հրանտ Կալենտերյանը։
«Գրանցված դրական արդյունքը հնարավոր չէր լինի առանց բարեգործական հիմնադրամների, մասնավորաես, «Նվիրիր կյանք» հիմնադրամի, որի աջակցության շնորհիվ անվճար գնվել է 60 դեղաչափ»,–«Արմենպրեսի» փոխանցմամբ՝ տեղեկացրեց Կալենտերյանը։

Լրագրողների հետ զրույցում նեոնատոլոգ Պավել Մազմանյանը ընդգծեց, որ դեղամիջոցը նվազեցնում է վաղածին երեխաների մահացությունը՝ թոքերի վնասվածքների հավանականության նվազեցման եւ նրանց թոքային հիվանդությունների միջոցով։ Նրա խոսքով՝ նման դեղամիջոցի մեկ դեղաչափը արժե 600 ԱՄՆ դոլար եւ ցուցված է ոչ բոլոր անհաս երեխաներին։ Այն նախատեսված է, մասնավորապես, 1 կգ—ից ցածր քաշ ունեցող երեխաների համար։

Մասնագետը տեղեկացրեց, որ Հայաստանում տարեկան շուրջ 40 հազար ծնունդներից մեկ տոկոսի դեպքում է գրանցվում վաղածնություն։
Նորեմբերի 17—ը նորածին երեխաների խնամքի եվրոպական ֆոնդի նախաձեռնությամբ աշխարհում նշվում է որպես Վաղածին երեխաների միջագային օր՝ 2009 թվականից սկսած։ Ամեն տարի աշխարհում շուրջ 15 միլիոն վաղածին երեխա է ծնվում, ինչը նշանակում է, որ յուրաքանչյուր 10 երեխայից մեկը ժամկետից վաղ է լույս աշխարհ գալիս։ Միջազգային վիճակագրության համաձայն՝ աշխարհում տարեկան 1 միլիոնից ավելի վաղածին երեխաներ մահանում են, իսկ շատերն էլ տառապում են տարատեսակ, մասնավորապես, նյարդաբանական հիվանդւոթյուններով եւ ֆիզիկական անլիարժեքությամբ։

«Հայաստանում «Սուրվանտա» դեղամիջոցի կիրառումը շնչառական դիստրես—սինդրոմով վաղածին երեխաների բուժման մեջ» ծրագիրը համատեղ նախաձեռնել եւ իրականացրել են հայկական բժշկադեղագործական «ՖարմԹրասթ» ընկերությունը, «Նվիրիր կյանք» հիմնադրամը, որի պատվավոր նախագահը Ռիտա Սարգսյանն է, ՀՀ առողջապահության նախարարության մի շարք կլինիկաներ եւ առաջատար մասնագետներ։