Բարեւին հաջորդող առաջին հարցն էր՝ «Այստեղ ինչպե՞ս եք «նստում»։ Սոլակցու՝ համայնքի բժշկին ուղղված ավանդական հարցն արդեն «արխիվացված» է։ Նախկին անմխիթար փայտե տնակի փոխարեն համայնքը նորակառույց առողջության առաջնային պահպանման կենտրոն ունի։ Այն սպասարկում է 2570 բնակչությամբ համայնքին։

Կոտայքի մարզի Սոլակ համայնքի ամբուլատորիայի բացումը երեկ էր։ Կենտրոնը կառուցվել է «Հայաստանի առողջապահական համակարգի արդիականացում ծրագիր 2»—ի շրջանակներում։
Նոր շենքի շինարարական աշխատանքները սկսվել են 2012 թվականի դեկտեմբերին։ Ընդհանուր առմամբ Սոլակ համայնքում ներդրվել է շուրջ 51.5 մլն դրամ, որից շուրջ 49 մլն դրամ՝ շինարարության համար (նախահաշվային արժեքը՝ 61.02 մլն դրամ) եւ շուրջ 2.5 մլն դրամ՝ բժշկական սարքավորումների, բժշկական կահույքի եւ պարագաների համար։ Ծրագրի շրջանակներում դեռ 2008—ին ամբուլատորիայի մեկ բժիշկ եւ երկու բուժքույր մասնագիտացել են որպես ընտանեկան բժիշկ եւ բուժքույր։

Ընդհանուր առմամբ երկրորդ վարկային ծրագրի առաջին փուլում Կոտայքի մարզում կատարվել է 249,269.8 հազար, իսկ երկրորդ փուլում՝ 204,013.9 հազար դրամի ներդրում։ Առողջապահական համակարգի արդիականացման երկրորդ ծրագրի լրացուցիչ ֆինանսավորման վարկային ծրագրի շրջանակներում 2012թ. դեկտեմբերից կառուցվել եւ 2013—ին շահագործման են հանձնվել Լեռնանիստ, Վերին Պտղնի, Ակունք, ինչպես նաեւ Սոլակ համայնքների ԱԱՊԿ—ները։ Արդյունքում ՀԲ կողմից աջակցվող առողջապահական ծրագրերի շրջանակներում մարզում վերանորոգվել կամ կառուցվել է 23 ամբուլատորիա։

«Կոտայքում սա 23—րդն է։ Բայց այս մարզի դեռ 5 համայնքում ունենք ամբուլատորիա կառուցելու խնդիր։ Այս տարի 13 ամբուլատորիա կառուցեցինք։ Հիմա ներկա ենք 12—րդի բացմանը։ Մյուսը Լոռու մարզում է։ Մոտ օրերս դրա բացումն էլ կիրականացնենք։ Համաշխարհային բանկի տրամադրած միջոցների խնայողությունների հաշվին նախատեսում ենք կառուցել 6 ամբուլատորիա, որոնցից 3—ը կլինի Տավուշում։ Այդ խնայողությունների հաշվին նախատեսվում է նաեւ վերանորոգել Մեծամորի պոլիկլինիկայի շենքը, կառուցել Ճամբարակի առողջության կենտրոնի շենք եւ նորոգել ու ձեռք բերել շտապօգնության մեքենաներ։ Ծրագիրն անընդհատ շարունակվելու է այնքան ժամանակ, մինչեւ վերջին համայնքում ամբուլատորիա չկառուցենք»,–լրագրողների հետ զրույցում ասաց ՀՀ առողջապահության նախարար Դերենիկ Դումանյանը։
Կոտայքի մարզպետ Կովալենկո Շահգալդյանն էլ հայտարարեց, որ հետեւողական են լինելու ավելի բարձր մակարդակով բուժսպասարկման հարցում։ Իսկ ամբուլատորիայի ներկայացուցիչներին հորդորեց ստեղծածը պահպանել։

Սոլակի առողջության առաջնային պահպանման կենտրոնի տնօրեն Ասյա Մելքումյանն անկեղծանում է, որ նախկին պայմաններում ինքն իր երեխային չէր բերի այդ ամբուլատորիա։ Բանն այն է, որ պայմաններից ելնելով անգամ հնարավոր չէր որոշ սարքեր օգտագործել, չկային տարրական հարմարություններ։
Իսկ հիմա բացի այն բանից, որ նոր կառույցի հնարավորությունները մասնագիտական աշխատանքին չեն խոչընդոտելու, ազգաբնակչության շրջանում վստահություն են առաջ բերելու, դեռ մի բան էլ նպաստելու են ծնելիության թվի մեծացմանը։ Համայնքի ղեկավար Բադալ Սարգսյանը համոզված է, որ իրենց գյուղում ծնելիությունն այսուհետ աստիճանաբար աճելու է։

Թամարա ՄՈՒՐԱԴՅԱՆ