Սրտի աշխատանքի, անոթների ու սրտամկանի վրա հաճախակի տապակած միս օգտագործելու վնասակարության մասին հայտնի է վաղուց, բայց քանի որ մարդկությունը չի շտապում հրաժարվել այդ համով ճաշատեսակից, գիտնականներին մնում է փնտրել ու գտնել գոնե այդ վնասը նվազեցնելու ուղիներ ու միջոցներ:

Իսրայելցի հետազոտողներին, մասնավորապես, հաջողվել է բացահայտել, որ վնասի չափը կարելի է իջեցնել կարմիր գինու չափավոր (մեկ բաժակ) օգտագործմամբ: Նրանում առկա պոլիֆենոլները ոչնչացնում են այն վնասակար նյութերը, որոնք մարդու արյան մեջ են անցնում միսը մարսելիս:

Վերջերս էլ նոր բացահայտումով հանդես եկան Կալիֆորնիայի համալսարանի գիտնականները: Նրանք պարզել են, որ անոթային աթերոսկլերոզի առաջացման ու զարգացման վտանգը գինուց ոչ պակաս իջեցնում է ավոկադո կոչված միրգը:
Նրանց հետազոտությանը մասնակցել են 18-35 տարեկան առողջ տղամարդիկ, որոնք կերել են մեկական դասական բուրգեր, որից հետո առաջարկվել է ուտել ևս մեկը, բայց արդեն կես ավոկադոյի հետ: Պարզվել է, որ տապակած միսն ավոկադոյին ընկերացած այնքան վնասակար չէ, որքան առաջին դեպքում…

Պատճառն այն է, որ այդ միրգը պարունակում է շատ օմեգա-3 ճարպեր, որոնք օգտակար են սրտի համար և դրանով իսկ չեզոքացնում են օրգանիզմում տապակած մսի հրահրած բորբոքման մակարդակը:

Բժիշկները տապակած մսի հանդեպ կիրքը վաղուց են կոչել մարդու վնասակար սովորություններից մեկը` քանի որ տապակած միսն իր մեջ պարունակում է կանցերոգեն նյութեր, որոնք էլ քաղցկեղի առաջացման պատճառ են դառնում:

Տապակած միսը վտանգավոր է հատկապես տղամարդկանց համար, ըստ գիտնականների` լավ տապակած միսը 2 անգամ ավելացնում է շագանակագեղձի քաղցկեղի առաջացման վտանգը: