ՀՀ առողջապահության նախարարին կից կոլեգիայի հերթական նիստում քննարկման դրվեց «Բժշկական ծառայությունների որակի բարելավմանն ու կոռուպցիոն ռիսկերի նվազեցմանն ուղղված միջոցառումների մասին» կոլեգիայի որոշման նախագիծը։
«Այսօր կոլեգիայի անդամների եւ մարզպետարանների առողջապահության վարչությունների պետերի ուշադրությանն ենք ներկայացնում բժշկական ծառայությունների որակի բարելավմանը եւ համակարգում կոռուպցիոն ռիսկերի նվազեցմանը միտված 40 միջոցառում՝ հինգ տարբեր ուղղություններով։

Դրանց կատարումով իրավական անհրաժեշտ հող կնախապատրաստենք 2014 թվականից բժշկական ծառայությունների որակի բարելավմանն ու կոռուպցիոն ռիսկերի նվազեցմանն ուղղված ծրագրային, համակարգված փոփոխություններ իրականացնելու համար։ Ահա թե ինչու ներկայացվող միջոցառումները պետք է իրականացնենք մինչեւ դեկտեմբերի 20—ը։ Ասեմ, որ կազմակերպական շատ հարցեր լուծված են, մի շարք աշխատանքներ կատարելու համար համապատասխան հրամանները ստորագրված են։ Նոյեմբերի 28—ից մինչեւ դեկտեմբերի 25—ը Երեւանի եւ մարզերի բուժհաստատություններում մշտադիտարկման առաջին փուլն իրականացնող խմբերն արդեն կազմավորվել են, հրամանով հաստատվել է նրանց կողմից ուսումնասիրվող հարցերի շրջանակը։ Առաջին փուլի արդյունքների ամփոփումից հետո կհստակեցվեն թիրախները, գուցե ուսումնասիրման նոր հարցեր ընդգրկվեն։ Ինչպես շատ այլ միջոցառումներ, մշտադիտարկումը նույնպես շարունակական է լինելու։ Դրանք մեծ ճանապարհի սկիզբն են, ուստի յուրաքանչյուր կետի քննարկման ժամանակ շահագրգիռ մոտեցում եմ ակնկալում»,–բացելով նիստն, ասաց նախարար Դերենիկ Դումանյանը։

ՀՀ ԱՆ առողջապահության ազգային ինստիտուտի տնօրեն Պարունակ Զելվեյանը կոլեգիայի անդամներին ներկայացնելով միջոցառումների ցանկը՝ ընդգծեց, որ դրանց նպատակն է բարձրացնել առողջապահական համակարգի գործունեության թափանցիկությունն ու վերահսկելիությունը, նվազեցնել եւ կանխարգելել հնարավոր կոռուպցիոն ռիսկերը, բարելավել առողջապահական համակարգի գործունեության արդյունավետությունը, բարձրացնել առողջապահական ծառայությունների հասանելիությունն ու մատչելիությունը։

ՀՀ Ազգային ժողովի առողջապահության, մայրության եւ մանկության մշտական հանձնաժողովի նախագահ, կոլեգիայի անդամ Արա Բաբլոյանը, ով ակտիվ մասնակցություն է ունեցել փաստաթղթի մշակմանը, շեշտեց, որ ներկայացված միջոցառումներից շատերը հետագայում համակարգում առկա թերությունները շտկելուն ուղղված համակարգային ծրագրեր կդառնան։

Ակադեմիկոս Վիլեն Հակոբյանը, սիրիահայ բժիշկ Ջորջ Բարսեղյանը եւ մյուս բոլոր արտահայտվողները բարձր գնահատեցին կատարված աշխատանքը եւ աջակցության պատրաստակամություն հայտնեցին։

«Ինչ վերաբերում է կոռուպցիոն ռիսկերին, ապա դրանց նվազեցման ուղղությամբ ուզում ենք համակարգված փոփոխություններ կատարել։ Այս փաստաթուղթն իր մեջ ընդգրկում է այդ նպատակին հասնելու ծրագրային բազմաթիվ դրույթներ։

Միաժամանակ մեծ կարեւորություն ենք տալիս բուժհիմնարկների աշխատանքի թափանցիկության ապահովմանը։ Նրանց համար պայմանագրային պարտադիր պայման ենք դարձրել կայքերի առկայությունը, որոնցում որոշ ցուցանիշների ամենօրյա թարմացումը շատ կարեւոր տեղեկատվություն կապահովի։
Այնպես որ, մի քանի ուղղություններով լայնածավալ աշխատանքներ ենք սկսում, որոնք պիտի տանեն համակարգում լավագույնը խրախուսելուն, իսկ անընդունելին դուրս վանելուն։ Սա է մեր նպատակը, որին հասնելու համար բոլորս միասին մեծ ջանքեր ենք գուրծադրելու»,–ամփոփելով նիստն՝ ասաց նախարար Դումանյանը։

Կոլեգիան միաձայն հաստատեց ներկայացված որոշման նախագիծը։