Ինչպե՞ս խուսափել ցրտահարությունից ձմռան այս սառը օրերին, եւ ի՞նչ միջոցներ ձեռնարկել, եթե, այնուամենայնիվ, դա տեղի է ունեցել։ Երեւանի Երկաթուղու պոլիկլինիկայի տնօրեն, բժիշկ մաշկաբան Միսակ Նահապետյանը պարզաբանեց, թե ինչ ազդեցություն եւ հետեւանքներ կարող է թողնել ցածր ջերմաստիճանը մարդու մաշկի վրա, եւ խորհուրդներ տվեց, թե ինչպես պետք է վարվել, երբ պատուհանից այն կողմ ցրտաշունչ ձմեռ է։

«Մաշկի խնամքը շատ կարեւոր խնդիր է, քանի որ այն առաջինն է ենթարկվում տարբեր գործոնների ազդեցությանը, իսկ պահանջվող խնամքը տարբեր ջերմաստիճանային պայմաններում տարբեր է», - ասաց բժիշկը։

Ըստ նրա, ցածր ջերմաստիճանի պայմաններում նվազում է քրտնագեղձերի գործունեությունը, տեղի է ունենում մազանոթների կծկում՝ ջերմատվությունը նվազեցնելու եւ ջերմությունն օրգանիզմում պահելու համար: Ցածր ջերմաստիճանի պայմաններում երկարտեւ գտնվելու դեպքում մաշկի մազանոթների, զարկերակիկների կծկումը երկարատեւ է լինում, ինչը կարող է հանգեցնել վերջույթների՝ ոտքերի եւ ձեռքերի մատների, քթի ծայրի, ականջների ցրտահարության, սնուցողական խանգարումների, ընդհուպ մինչեւ մեռուկի առաջացման:

Խոսելով այն մասին, թե ինչ է պետք անել ցրտից պաշտպանվելու համար, Միսակ Նահապետյանը նշեց, որ շատ կարեւոր դեր ունի այս հարցում ըստ եղանակի եւ ճիշտ հագնվելը։

«Ավելորդ չեմ համարում նշել, որ պետք է հագնվել եղանակին համապատասխան, խուսափել շատ քիփ հագուստից, քանի որ այդ դեպքում մաշկի եւ հագուստի միջեւ չի մնում ջերմամեկուսիչ օդային շերտ: Կարեւոր է տնից դուրս գալուց առաջ օգտագործել ճարպային հիմքի վրա պատրաստված քսուքներ։ Դրանք պետք է քսել հատկապես մարմնի բաց հատվածներին՝ ձեռքերին, դեմքին, ինչպես նաեւ ոտքերի թաթերին՝ամենահաճախ ցրտահարվող մարմնի հատվածներին: Հատուկ ուշադրություն պետք է դարձնել ձմեռային կոշիկների ընտրությանը, որոնք չպետք է լինեն շատ նեղ, քանի որ դա իր հերթին խաթարում է արյան շրջանառությունը եւ նպաստում ոտքերի ցրտահարմանը:Անպայման է նաեւ ձեռնոցների եւ գլխարկի կրումը, ընդ որում ցանկալի է ընտրել այնպիսի գլխարկ, որը կծածկի նաեւ ականջները: Սաստիկ ցրտի եւ հատկապես բքի ժամանակ խորհուրդ է տրվում նաեւ ծածկել դեմքը», - ասաց նա։

Ըստ բժշկի, ցրտահարման խորությունից կախված գոյություն ունի ցրտահարման 4 աստիճան, ինչից ելնելով էլ առաջին կլինիկական դրսեւորումները տարբերվում են: Թեթեւ դեպքերում վերջույթը գունատվում է, ստանում մարմարագույն երանգ, լինում է նաեւ զգայունության փոփոխություն, թմրածություն, մրմուռ, ընդհուպ մինչեւ ցավ, իսկ ավելի ծանր դեպքերում մաշկի եւ փափուկ հյուվածքների մեռուկացում:

«Եթե դուք նկատում եք ցրտահարության առաջին նշանները, պետք չէ փորձել բարձր ջերմաստիճանով կտրուկ տաքացնել վերջույթը, քանի որ ցրտահարության ժամանակ առկա է մաշկի ջերմազգայուն ընկալիչների ախտահարում, ինչն էլ կարող է հանգեցնել լրացուցիչ այրվածքների առաջացման: Խորհուրդ է տրվում վերջույթը տաքացնել շփումների միջոցով, առկայության դեպքում՝ ճարպային քսուքների, ինչքան էլ որ տարօրինակ է, նաեւ ձյան, ինչը նպաստում է արյան շրջանառության վերականգնմանը։ Վերջին դեպքում կարեւոր պայմանն է ՝ մաշկի գույնի վերականգնումից հետո վերջույթի չորացումը եւ ուրեւէ տաք հագուստի կրումը մինչեւ համապատասխան մասնագետի դիմելը։ Եւ դա չի կարելի հետաձգել՝ հետագա բարդություններից խուսափելու համար», - ասաց մաշկաբանը։
NEWS.am Medicine