Հիվանդին հետազոտելու եւ ախտորոշելու փոխարեն «լիդոկային» ներարկած Գյումրիի թիվ 1-ին պոլիկլինիկայի բժիշկ-գինեկոլոգ Ֆուրման Մադոյանի դեմ նախկինում եւս մեկ անգամ քրեական գործն էր հարուցվել:

NEWS.am-ի խմբագրություն զանգահարած Կապանի բնակիչ Հասմիկ Մկրտումյանը պատմել է, որ երկու տարի առաջ Կապանի բժշկական կենտրոնում բժիշկ Ֆուրման Մադոյանի սխալ բուժօգնություն ցուցաբերելու հետեւանքով այժմ նա չի կարող երեխա ունենալ:

Բայց դա դեռ ամենը չէ, բժիշկ Մադոյանը նրան բազմաթիվ դեղեր էր նշանակել մեծ չափաքանակներով եւ այդ մասին ոչինչ չի գրել նրա բժշկական քարտում:

«Եթե ինքը ճիշտ բուժում արած լիներ, այդքան դեղեր, որ նշանակել է, քարտում գրած կլիներ»,- ասաց նա: Հասմիկ Մկրտումյանը նշեց, որ այդ ժամանակ իր մոտ արտաարգանդային հղիությունն էր (ինչը հետագայում քրեական գործի շրջանակներում երկու անգամ ապացուցվել է նաեւ դատաբժշկական փորձաքննությամբ), սակայն բժիշկ Մադոյանը ասել էր, թե «վեներական հիվանդ է»:

«Ես ծանր վիճակով` բարձր ջերմությամբ ու ցավերով դիմել եմ հիվանդանոց: Նա ինձ ընդունել է, ինչ-որ բուժումներ է արել, որը ես մինչեւ հիմա էլ չգիտեմ, քարտում գրանցված էլ չէ, երբ իմ վիճակը ավելի վատացավ, ես նրան խնդրեցի թույլ տալ տուն գնալ, նա չթողեց, ասացի` երեխաս առանց ինձ չի մնում, մի կերպ թողեց, գնացի սոնոգրաֆիա անցա, ասացին, որ ներքին արյունահոսություն կա, զանգեցի իրեն, ասաց, որ արձակուրդ է գնում եւ չի կարող օգնել»,- պատմեց նա` հավելելով, որ գնացել էր Կապանի բժշկական կենտրոն` տեղեկանք վերցնելու եւ Երեւան տեղափոխվելու համար, սակայն Մադոյանի որդին, ով էլի բժիշկ է, «ստիպել է փող տալ, նույնիսկ փորձել է ձեռք բարձրացնել հիվանդի վրա»:

Երեւանում նրան վիրահատել են եւ փաստել, որ արտաարգանդային հղիություն է ունեցել: Բոլոր փաստաթղթերը Հասմիկ Մկրտումյանը հավաքել եւ ուղարկել է Գլխավոր դատախազին, Առողջապահության նախարարությանը եւ հարուցվել է քրեական գործ:

Ինչպես տեղեկանում ենք պաշտոնական «Դատալեքս» կայքից, Ֆուրման Մադոյանը մեղավոր է ճանաչվել ՀՀ քրեական օրենսգրքի 130 հոդվածի առաջին մասով եւ դատապարտվել է տուգանքի նվազագույն աշխատավարձի 150-ապատիկի չափով, որը, Հասմիկ Մկրտումյանի խոսքով, մոտ 150.000 դրամ է: Նրա քաղաքացիական հայցը բավարարվել է ամբողջությամբ եւ Ֆուրման Մադոյանից բռնագանձվել է 436.322 դրամ` որպես վնասի հատուցում:

«Ես նամակ ուղարկեցի Առողջապահության նախարարությանը, հարցնելով, թե ինչո՞ւ է դատապարտված բժիշկը շարունակում աշխատել եւ անգամ ղեկավարում մի ամբողջ բաժին: Ինձ ասացին, որ դա իրենց իրավասության մեջ չի մտնում, մարզպետարանի առողջապահության վարչության իրավասության տակ է»,- պատմեց նա:

Դրանից հետո Հասմիկ Մկրտումյանը չի դիմել ոչ մարզեպատարան, ոչ էլ հիվանդանոցի ղեկավարությանը, քանի որ «իմաստ չուներ, բոլորն էլ տեսնում էին` ինչ էր կատարվում ու ոչ ոք ոչինչ չէր անում»:

Նշենք, որ «Դատալեքս» կայքում դատական գործերի որոնման բաժնում մեզ հաջողվեց գտնել Ֆուրման Մադոյանի դեմ հարուցված երկու քրգործերն էլ, սակայն երկրորդի մեջ դատվածություն կատեգորիայում նշված չէր, որ նա մի անգամ արդեն դատվել է:

Ավելի վաղ NEWS.am-ը հայտնել էր, որ հունիսի 18-ին Գյումրիի թիվ 1-ին պոլիկլինիկայի բժիշկ-գինեկոլոգ Ֆ.Մադոյանը պոլիկլինիկայի իր աշխատասենյակում ընդունել է հիվանդ Է.Եղոյանին եւ վերջինիս հետազոտելու եւ ախտորոշելու նպատակով, որոշել է վերջինիս արգանդի վզիկից քսուք վերցնել:

Նախաքննական մարմնի գնահատմամբ, տվյալ բժշկական միջամտությունը կատարելու ընթացքում բժիշկը իր մասնագիտական պարտականությունները կատարել է ոչ պատշաճ եւ դրանց նկատմամբ դրսեւորել անփույթ վերաբերմունք, այն է՝ Է.Եղոյանի արգանդից քսուք վերցնելու համար, առանց անհրաժեշտության, արգանդի վզիկ է ներարկել «Լիդոկային» տեսակի դեղամիջոց, որից Է.Եղոյանը ընկել է անաֆիլատիկ շոկի մեջ եւ, գիտակցության չգալով, մահացել է: