Առողջապահության նախարարության և դանիական «Նովո-Նորդիսկ Ա/Ս» ընկերության միջև ստորագրվել է փոխըմբռնման հուշագիր, որի նպատակն է կրթական ծրագրերի միջոցով համագործակցության ամրապնդումն ու զարգացումը հանրային առողջության տարբեր ոլորտներում:

Կարևորելով հանրության առողջության բարելավման անհրաժեշտությունը, հաշմանդամության և մահացության ցուցանիշի նվազեցմանը միտված միջոցառումները, հիվանդությունների վաղ հայտնաբերման և կանխարգելման ուղղությամբ իրականացվող ծրագրերը, ինչպես նաև ակտիվ համագործակցության ապահովումը միջազգային և այլ կառույցների հետ` առողջապահության նախարարությունն ակնկալում է այս հուշագրով զարկ տալ նաև շաքարային դիաբետի դեմ պայքարի ուսումնական ծրագրերին:

Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, կրթական այդ ծրագրերը համագործակցության մեծ դաշտ կստեղծեն և կնպաստեն համատեղ միջոցառումների միջոցով հանրության իրազեկվածության մակարդակի բարձրացմանը:

Բացի այդ, «Նովո-Նորդիսկ Ա/Ս» ընկերությունը համագործակցության շրջանակներում նախատեսում է նաև Հայաստանի Հանրապետության էնդոկրինոլոգների ամենամյա համաժողովների կազմակերպում, մասնագետների վերապատրաստում, հայերենով կրթական գրքույկների և ցուցանակների թողարկում` պարբերաբար թարմացնելով տեղեկատվությունը: