Քնած ժամանակ մարդն ի զորու չէ վերահսկել ինքն իրեն, նաև` ձևացնել….հենց դրա համար էլ յուրաքանչյուրիս համար սովորական դարձաձ դիրքը քնի մեջ, ինչպես հոգեբաններն են ասում, որոշ բաներ են վկայում մեր ինքնության` բնավորության, բարդույթների և խնդիրների մասին:

Մեջքի վրա քնելու դիրքը կոչում են արքայական կամ առյուծի դիրք: Այն հատուկ է իրենց վրա վստահ, ուժեղ մարդկանց, որոնք կյանքից գալիք վտանգի վախ չունեն: Ժողովրդական իմաստնությունն իզուր չի ասում. «Մեջքի վրա քնում են թագավորները, կողքի վրա`իմաստունները, փորի վրա` հարուստները…»:

Նույն դիրքով, բայց ձեռքերը տարածած, ոտքերն ուղիղ մեկնած քնողներին բնորոշ են ստեղծագործական մեծ ներուժն ու վառ բնավորությունը:

«Ի դեպ, եթե սկսել եք քնից արթնանալ «արքայական» դիրքում, ընդ որում` ձեռքերը մեկնած գլխից վեր, որը հատուկ չի եղել ձեզ նախկինում, անպայման անցեք սրտային հետազոտությամբ, որովհետև հնարավոր է, որ դա նշան է սրտի աշխատանքի խանգարումների»,- ասում է հայտնի հոգեբան Սամուել Դանքելը:

Տագնապոտ անձինք, որոնք անհանգստանում են իրական կամ թվացյալ վտանգներից, քնած ժամանակ կարծես ձգտում են «թաքցնել» որովայնը: Նրանք քնում են փորի վրա, երբեմն գրկելով բարձը, կամ էլ, հատկապես, սթրեսի շրջանում, գունդուկծիկ դարձաձ: Այս վերջին դիրքը կոչվում է նաև էմբրիոնի դիրք: Ըստ հոգեբանների` նման անձինք իրենց թույլ չեն տալիս ընդառաջ գնալ կյանքի ուրախություններին ու դժվարություններին, լիարժեք չեն օգտագործում իրենց կենսական ներուժը…