Փետրվարի 4—ն ամբողջ աշխարհում ուռուցքաբաններին համախմբում է քաղցկեղի դեմ պայքարի շուրջ։ Այս առնչությամբ լրագրողների հետ հանդիպմանը հայ–ամերիկյան բժշկական կենտրոնի տնօրեն Խաչանուշ Հակոբյանը նշեց, որ իրենց կենտրոնում հետազոտված ամեն 16—րդ կնոջ մոտ ախտորոշվում է կրծքագեղձի քաղցկեղ։ Մասնագետների համար այս հիվանդության դեմ պայքարը չի սահմանափակվում միայն մեկ օրով, այլ պահանջում է շարունակական աշխատանք։

«Քաղցկեղն առայժմ բուժում չունի, միակ բուժումը կանխագելումն է։ Հիվանդությունը ամենավաղ փուլում հայտնաբերվելու դեպքում միայն վիրահատական փոքր միջամտություն է պահանջվում»,–«Արմենպրեսի» փոխանցմամբ, նշեց Հակոբյանը։
Նրա խոսքով՝ ՀԱԱ գործունեության 17 տարիներին կատարվել է ավելի քան 325 հազար 164 հետազոտություն։ Տարեկան կենտրոնը հետազոտում է 35—36 հազար կնոջ։ Նշված ժամանահակատվածում կրծքագեղձի քաղցկեղ ախտորոշվել է շուրջ 7, 533 այցելուի մոտ։ Կենտրոնում հետազոտվածներից 109, 674—ն կրծքագեղձի բարորակ ախտահարում ունի։

«21—րդ դարում կրծքի քաղցկեղից մահանալը ես անգրագիտություն եմ համարում»,—ընդգծեց կենտրոնի տնօրենը։ Նա հրավիրեց կանանց ուշադրությունը այն հարցի շուրջ, որ մամոգրաֆիական հետազոտությունն իրենց կենտրոնում արժե 20 հազար դրամ, ինչը մատչելի է յուրաքանչյուրի համար տարեկան կտրվածքով. համեմատած այլ երկրների հետ, ուր բուժումը համարժեք է 1000 ամերիկյան դոլարի, մեր երկրում բուժումն ավելի մատչելի է։ Հակոբյանի գնահատմամբ, քաղցկեղի հայտնաբերելիությունն աճել է, ինչը պայմանավորված է բնակչության տեղեկացվածության աստիճանի բարձրացմամբ։
Նա նշեց, որ կենտրոնում իրականացվում են անվճար հետազոտություններ սոցիալական տարբեր խոցելի խմբերի համար։

Բժիշկ—ռադիոլոգ Անի Հակոբյանն էլ նշեց, որ կրծքագեղձի քաղցկեղը շատ հազվադեպ, բայց հանդիպում է նաեւ տղամարդկանց մոտ։ Նման ախտորոշմամբ տղամարդկանց թիվը կենտրոնում 32—ն է։ «Տղամարդկանց մոտ կրծքագեղձի քաղցկեղը ուշ է հայտնաբերվում եւ հիմնականում՝ բարձիթողի վիճակում։ Այս հիվանդությունը տղամարդկանց մոտ 100 անգամ ավելի քիչ է հանդիպում, քան՝ կանանց»,–նշեց Անի Հակոբյանը։

Բանախոսները հիշեցրեցին, որ 35—40 տարեկան հասակում կանայք տարին մեկ անգամ պետք է կատարեն մամոգրաֆիական հետազոտություն, իսկ մինչ 35 տարեկան կանանց եւ աղջիկներին խորհուրդ է տրվում կատարել սոնոգրաֆիական հետազոտություն հատկապես այն դեպքում, երբ ընտանիքում կա ժառանգական նախատրամադրվածություն եւ մոտ ազգականներից մեկը հիվանդ է եղել կրծքի քաղցկեղով։
Հայաստանում կրծքագեղձի քաղցկեղը արձանագրել է նաեւ երիտասարդացման միտում։ ՀԱԱ կենտրոնում կրծքագեղձի քաղցկեղից բուժում է ստանում 0—29 տարեկան 62 հիվանդ։

Կրծքագեղձի քաղցկեղը չարորակ ուռուցք է, որը սկիզբ է առնում կրծքի բջիջներից։ Բժշկի կողմից անցկացված կրծքի պարբերական կլինիկական քննությունների, մամոգրամների եւ ինքնազննումների միջոցով կրծքի քաղցկեղի վաղ բացահայտումը հնարավորություն է տալիս բուժումը սկսել ավելի վաղ՝ բուժելի փուլում։

Հայ—ամերիկյան կենտրոնը հագեցված է ժամանակակից տեխնիկայով։ Կենտրոնն ունի թվայնացված մամոգրամ, որից աշխարհում ընդամենը 53 քաղաք ունի։ Կենտրոնը աշխատանքներ է իրականացնում նաեւ մարզերում։