Տորոնտոյի համալսարանի մասնագետները, լայնածավալ հետազոտություն անցկացնելուց հետո հայտարարել են, որ տարածված կարծիքը, թե արյան խմբով պայմանավորված սննդակարգն ու դիետաները դրական են ազդում առողջության վրա, իրականության հետ ոչ մի աղերս չունի:

Գիտնականները ոչ մի կապ չեն գտել փորձարկման մասնակիցների արյան խմբի և պահվող դիետայի արդյունավետության միջև. աշխատությունը հրապարակվել է PLoS One ամսագրում:

«Մեդպորտալ.ռու»-ի հաղորդմամբ, արյան խմբով դիետան տարածում գտավ 1990-ականների վերջում «Eat Right for Your Type» գրքի շնորհիվ, որը թարգմանվել է աշխարհի 52 լեզուներով և վաճառվել է 7 մլն օրինակից ավելի: Եվ ահա կանադացի գիտնականների հետազոտությունները ցույց են տվել, որ բոլոր տեսակի դիետաները մասնակիցների առողջության վրա լավ ազդեցություն են ունեցել` կարգավորելով նրանց քաշը, արյան ճնշումը, խոլեսթերինի մակարդակը և այլն: Սակայն որևէ վիճակագրական կապ արյան խմբով դիետա պահելու և առողջությունը բարելավելու միջև չի հաստատվել: