Գիտնականները պնդում են, որ եթե մարդը բջջայինն անջատի երեկոյան ժամը 9-ին, դա նրան կօգնի ավելի արդյունավետ անցկացնել հաջորդ աշխատանքային օրը:

Մասնավորապես, Վաշինգթոնի համալսարանի մասնագետները ուսումնասիրության արդյունքում եկել են այն եզրահանգման, որ սմարթֆոնների օգտագործումը երեկոյան ժամերին և գիշերը բացասաբար է անդրադառնում քնի որակի վրա, ինչն էլ որպես հետևանք ազդում է աշխատունակության վրա: Այդ իսկ պատճառով խորհուրդ է տրվում դրանք անջատել ժամանակին:

«Վեստի.ռու»-ի հաղորդմամբ, ազդեցության պատճառները սմարթֆոնների էկրանի մեջ են, որը ազդում է քնի վրա, հատկապես դրա կապույտ գույնը: Այդ կապույտի փոքրիկ չափաբաժինն անգամ ունակ է քնահարամ անել, քանի որ խանգարում է հանգստության համար անհրաժեշտ մելաթոնին հորմոնի արտադրությանը:

Գիտնականները այն կարծիքին են, որ խնդրի լուծումը գործատուների որոշման մակարդակում է գտնվում` վերջիններս պետք է համաձայնեցնեն աշխատակիցների հետ օնլայն տիրույթում գտնվելու ժամանակը և չպահանջեն նրանցից միշտ կապի մեջ լինել:

Աղբյուր` Panorama.am