Ուռուցքաբանության ազգային կենտրոնում այսօր խնդիրներ կան պետպատվերի շրջանակներում տրամադրվող քիմիաթերապիայի հետ: Ինչպես այսօր լրագրողների հետ հանդիպման ժամանակ ասաց կենտրոնի տնօրեն, ՀՀ ԱՆ գլխավոր ուռուցքաբան Հայրապետ Գալստյանը, խնդիրը նրանում է, որ չարորակ ուռուցքներով հիվանդների թիվն ավելացել է և պետպատվերով քիմիաթերապիա ստանալու համար հիվանդները ստիպված հերթի են կանգնում:

Ըստ նրա` հերթագրումը կատարվում է պետպատվերի շրջանակներում, սակայն միշտ չէ, որ կարողանում են հիվանդին իր հերթին համապատասխան սպասարկել, ուստի հիվանդների մոտ առաջանում են դժգոհություններ:

«Դժգոհությունները հիմնականում պայմանավորված են դրանով, որպեսզի այդ խնդիրները հաղթահարենք, հերթերից խուսափենք, եռահերթ ռեժիմի ենք անցել, սակայն հիվանդների թիվը տարեցտարի ավելանում է և խնդիրը լուծում չի ստանում»,- ասաց Հ.Գալստյանը:

Գլխավոր ուռուցքաբանի խոսքերով` թեև քաղցկեղով հիվանդների քիմիաթերապիան իրականացվում է պետպատվերի շրջանակներում, այդուհանդերձ, պետական հատկացումները հաճախ չեն բավարարում վերջին սերնդի քիմիական տեխնիկայով բուժումն իրականացնելու համար: Մասնավորապես, կան այնպիսի դեղամիջոցներ, որոնք պետական միջոցներով հնարավոր չէ ձեռք բերել, քանի որ դրանք բավականին թանկ արժեն, իսկ պետությունը չունի դրա հնարավորությունը:

Ուռուցքաբանը անհիմն է համարում այն լուրերը, թե իրենց կենտրոնում քիմիաթերապիան անցկացնում են հին մեթոդներով: Խնդիրը, ըստ նրա, ոչ թե հին եղանակներն են, այլ միջոցների բացակայությունը:

«Նորաստեղծ դեղերն այնքան թանկ արժեն, որ անհասանելի է շարքային քաղաքացու համար»,- ընդգծեց Հ. Գալստյանը:

Օրինակ, ըստ նրա, կա մի դեղ, որի մեկ ներարկումն արժե 3100 եվրո. «Սա բավականին թանկ է և ոչ հիվանդը, ոչ էլ պետությունը չի կարող այդքան գումար տրամադրել: Միակ հույսը ապահովագրական ընկերություններն են, սակայն Հայաստանում ապահովագրական բժշկությունը դեռևս այդ աստիճանի չի զարգացել»:

Ինչ վերաբերում է քաղցկեղի վաղ հայտնաբերմանը, ուռուցքաբանը նշեց, որ Հայաստանում չարորակ ուռուցքների բարձիթողությունը հասնում է 45 տոկոսի, ինչը բավականին բարձր է: Խնդիրը ամբողջ աշխարհում է. բարձիթողությունը ցածր է միայն այն երկրներում, որտեղ պետական մակարդակով իրականացվում են պրոֆիլակտիկ միջոցառումներ:

Հ.Գալստյանը նշեց նաև, որ ԱՀԿ-ի տվյալներով 30 տոկոսով չարորակ ուռուցքների առաջացումը կարելի է կանխել առողջ ապրելակերպով: Դրա համար, ըստ նրա, պետք է խուսափել նստակյաց կյանքից, ծխելուց, անառողջ սննդից` ապխտած կերակուրներից, բացի այդ մեծ ուշադրություն պետք է դարձնել սննդային ռեժիմին:

«Բնակչությանը պետք է ներշնչել այն գաղափարը, որ չարորակ ուռուցքը ոչ թե դատավճիռ է, այլ բուժման ենթակա հիվանդություն»,- ընդգծեց Հ.Գալստյանը:

Աղբյուր` Panorama.am