Առողջապահության ոլորտում նորություններ կան. նախարարությունը հստակեցրել է բնակչության համար անվճար եւ արտոնյալ բժշկական օգնության տեսակները, նաեւ սոցիալապես անապահով եւ առանձին խմբերին հատկացվող անվճար բժշկական օգնության լրացուցիչ ծավալները։

Անվճար բուժօգնության արտոնություն սահմանող անապահովության միավորի շեմը 2014 թվականի հունվարի 1—ից սահմանվել է 30.00 միավոր։ Նախկինում այն 36.00 էր։ Դրա շնորհիվ անվճար բուժօգնության եւ սպասարկում ստանալու իրավունք ունեցողների թիվն ավելացել է շուրջ 270 հազարով։

Այս մասին երեկ հրավիրված ասուլիսի ժամանակ տեղեկացրեց ՀՀ առողջապահության նախարարի տեղակալ Վահան Պողոսյանը։ Նրա խոսքերով, փոփոխությունների արդյունքում մասնավորապես տրվել են օգտագործվող հիմնական հասկացությունների ձեւակերպումները, սահմանվել են պետության կողմից երաշխավորված անվճար եւ արտոնյալ պայմաններով բժշկական օգնության եւ սպասարկման տեսակները։
Սահմանվել են նաեւ բժշկական օգնության եւ սպասարկման գների հաստատման նոր մոտեցումներ։ Դրանց համաձայն՝ գները պետք է հաստատվեն առողջապահության նախարարի ստեղծած գնագոյացման հանձնաժողովի եզրակացությունների հիման վրա։ Սահմանվել են անվճար բժշկական օգնության գնագոյացման սկզբունքները, ինքնարժեքի տարրը եւ դրանց հաշվարկման կարգը։ «Կատարված բոլոր փոփոխությունները միտված են բուժօգնության դաշտի առավել կարգավորմանը»,—վստահեցրեց փոխնախարարը։

Հիմնովին փոփոխվել են հիվանդանոցային բժշկական օգնության եւ սպասարկման պայմանագրային գումարների հաշվարկման սկզբունքները։ Սահմանվել է, որ հիվանդանոցային բժշկական օգնության պայմանագրային գումարները պետք է հաշվարկել տարածաշրջանային համահարթեցման սկզբունքով։ Որպես համահարթեցման ցուցանիշ սահմանվել է կազմակերպությունների սպասարկման տարածքի բնակչության թիվը։ Ֆինանսավորման արդյունավետությունը բարձրացնելու նպատակով առողջության առաջնային պահպանման օղակում նեղ մասնագիտացված բժշկական օգնության ծառայությունների տնտեսումները կուղղվեն նույն կազմակերպությունների տարածքում սպասարկվող բնակչության դեղերի եւ լաբորատոր—գործիքային ախտորոշիչ հետազոտությունների լրացուցիչ ծավալներ տրամադրելուն։ Առանձին բաժին է հատկացված նաեւ հաշվետվությունների եւ ստուգումների կարգին։

Թամարա ՄՈՒՐԱԴՅԱՆ