Դեղերի նկարագրություն
Մեկ կաթիլ արյունը կյանք է փրկում
Այսօր մանկական քաղցկեղի դեմ պայքարի միջազգային օրն է։ Այդ կապակցությամբ «Նվիրիր կյանք» բարեգործական հիմնադրամի հոգաբարձուների խորհրդի պատվավոր նախագահ, ՀՀ նախագահի տիկին Ռիտա Սարգսյանի անմիջական ղեկավարությամբ ՀՀ ԱՆ «Պրոֆ. Ռ.Հ. Յոլյանի անվան արյունաբանական կենտրոն»—ում կազմակերպվել էր հերթական մարդասիրական ակցիան։ Շոուբիզնեսի անվանի ներկայացուցիչները գալիս եւ արյուն էին նվիրում հիվանդ երեխաների բուժման համար։ «Կազմակերպված անհատույց արյունատվության ակցիան, որին մասնակցեցին մեր հանրապետության լավագույն երգիչ—երգչուհիները, նաեւ գործարարներ, կօգնի, որպեսզի կարողանանք բուժօգնություն իրականացնել երեխաների շրջանում. մասնավորապես այդ արյունը ներարկվելու է լեյկեմիայով հիվանդ երեխաներին»,—լրագրողների հետ զրույցում ասաց արյունաբանական կենտրոնի տնօրեն պրոֆեսոր Սմբատ Դաղբաշյանը։ Նա նշեց, որ քիմիաթերապիայի ընթացքում արյան բաղադրամասերի մեծ անհրաժեշտություն է լինում։
«Երեխային բժշկական օգնություն ցուցաբերելիս կարեւոր են ոչ միայն դեղորայքը, ոչ միայն այն բժշկական պրոցեդուրաները, որոնք մենք իրականացնում ենք, այլեւ շատ ժամանակ առաջին հերթին՝ թարմ արյան բաղադրամասերը, որոնց ներարկման շնորհիվ հիվանդների համար պայմաններ են ստեղծվում հետագայում քիմիաթերապեւտիկ պրեպարատների ազդեցությունը մեծացնելու համար»,—ասաց նա եւ ավելացրեց, որ ակցիայի շնորհիվ արյան բանկը կհամալրվի թարմ արյան բաղադրամասերով։
«Այսօր ունենք պահեստավորված արյան բաղադրամասեր եւ կարողանում ենք մեր առօրյա հոգսերը հոգալ, սակայն ունենք կամավոր դոնորների պակաս, եւ առիթից օգտվելով կոչ եմ անում մեր բնակչությանը, մեր ՀԿ—ներին եւ այն մարդկանց, ովքեր առողջ են եւ կարող են բարեգործ լինել, մի փոքր արյուն նվիրել հիվանդ երեխաներին, այցելել արյունաբանական կենտրոն եւ նվիրաբերել արյուն հիվանդ երեխաների բուժօգնության կարեւոր գործը կազմակերպելու համար»,–ասաց պրոֆեսորը։
Նա նշեց, որ դոնոր լինել կարող է ցանկացածը, եթե բժիշկ—թերապեւտի մոտ զննություն է անցել, եւ վերջինս նրան թույլատրել է արյուն հանձնել։ Տվյալ անձը կարող է հանձնել 450 մլ արյան բաղադրամասեր։ Կան որոշակի հիվանդություններ, որոնց դեպքում հակացուցված է արյունատվությունը։ Դրանք, Դաղբաշյանի խոսքով, հիմնականում վարակիչ հիվանդություններն են, ուռուցքային եւ մի շարք այլ հիվանդությունները։ Իսկ արյունատվության խնդիրը մեզ մոտ օրեցօր առավել կարեւոր է դառնում։ Քանի որ արյան քաղցկեղի աճի միտում է նկատվում մեծահասակների, ինչպես նաեւ երեխաների շրջանում։
«Նվիրիր կյանք» բարեգործական հիմնադրամի հոգաբարձուների խորհրդի անդամ Շուշանիկ Արեւշատյանը, ով եւս եկել էր արյուն հանձնելու, առաջին անգամ չէ, որ նման բան է անում։ Արեւշատյանի խոսքով, իրենց ընտանիքում դա ընդունված երեւույթ է։ Նրա համոզմամբ, այդպիսի ակցիաների կարիքը մեր երկրում շատ է զգացվում. «Դոնորների կարիքն այժմ մեծ է. երեխաներին, որ քիմիաթերապիա են ստանում, շատ անհրաժեշտ է արյուն։ Դա թերեւս դեղորայքից կարեւոր է։ Այդ նպատակով կազմակերպում ենք նման ակցիաներ։ Սա թվով երրորդ ակցիան է»։
Երաժշտագետ Նաիրա Գյուրջինյանն էլ թեեւ արյուն չէր կարող հանձնել, քանի որ հակացուցումներ կային, սակայն որոշել էր իր լուման ներդնել. գալ եւ իր ընկերների կողքին լինել։ «Կարծում եմ՝ Հայաստանում պետք է հասնենք այն գիտակցության, որ մարդիկ գան եւ արյուն հանձնեն, եւ դա կատարվի ոչ միայն ակցիաների ժամանակ, այլեւ գոնե կես տարին մեկ անգամ»,—ասաց նա։
Երգիչ Վարդան Բադալյանը, կարեւորելով ակցիայի անցկացումը, նշեց, որ ուրախ է ինչ—որ բանով օգնելու իր օգնության կարիքը զգացող մարդկանց։ Թեեւ արյուն առաջին անգամ է հանձնում, սակայն նմանատիպ միջոցառումներին միշտ մասնակցել է։ Նա կոչ արեց բոլորին մասնակցել եւ իրենց լուման ներդնել երեխաների բուժօգնության գործում։
Հաղորդավար եւ շոումեն Եգոր Գլումովը չի հիշում, թե արդեն որերորդ անգամ է մասնակցում նման ակցիայի։ Նա կես տարին մեկ պարտադիր արյուն է հանձնում. «Ես հասկանում եմ, որ իմ արյունով կարող եմ օգնել ինչ–որ երեխայի՝ փրկվել կամ պայքարել իր կյանքի համար»։ Նա նաեւ տեղյակ է, որ դոնորությունն օգտակար է նաեւ հենց դոնորի համար։ «Ինձ տեսնելով դա կարելի է հասկանալ»,—ասաց նա եւ այնուհետեւ հորդորեց բոլորին՝ գալ եւ արյուն հանձնել։
«Եկեք, հանձնեք, բայց ոչ թե, որ ավելի առողջանաք, այլ օգնեք այն բալիկներին, ովքեր արյան կարիք ունեն։ Պետք է հասկանալ, որ այն երեխաներին, ովքեր անցնում են քիմիաթերապիա կամ այլ բժշկական պրոցեդուրաներ, ամեն օր արյուն է հարկավոր, իսկ արյունը փաստորեն մեր երկրում սակավ է»։
Ի դեպ, արյունաբանական կենտրոնի բժիշկները եւս հավաստեցին, որ դոնորությունը ոչ միայն չի վնասում, այլեւ օգտակար է դոնորի օրգանիզմին։
Լիլիթ ԱՍԱՏՐՅԱՆ
